Եվրամիությունը հավանության է արժանացրել Թուրքիայի տարածքում փախստականների աջակցության հիմնադրամի ֆինանսավորումը: Ըստ Reuters-ի, այս մասին հաղորդել են Եվրահանձնաժողովի ներկայացուցիչները:
ՌԻԱ Նովոստիի փոխանցմամբ, Բրյուսելում կայացած նիստում ֆինանսավորման մեխանիզմի օգտին արտահայտվել են Միության անդամ բոլոր 28 երկրները, այդ թվում՝ Իտալիան, որն ավելի վաղ արգելափակում էր միջոցների հատկացման որոշումը:
2015 թվականի նոյեմբերի 29-ին կայացած ԵՄ-Թուրքիա գագաթաժողովում վերջնականապես համաձայնեցվեց գործողությունների ծրագիրը, որի համաձայն, Թուրքիան պետք է նպաստի դեպի Եվրամիություն փախստականների հոսքի կրճատմանը, իր տարածքում նրանց ընդունման լավագույն պայմաններ ապահովի՝ 3 մլրդ եվրոյի, ԵՄ-ին երկրի անդամակցության բանակցությունների ակտիվացման եւ վիզային ռեժիմի ազատականացման դիմաց:
