Վազգեն Սարգսյանի անվան ռազմական ինստիտուտում 2015թ. հունվարին դաժանաբար սպանված կուրսանտ Հայկազ Բարսեղյանի գործով դատական նիստին այսօր՝ փետրվարի 4-ին, Ավան եւ Նոր Նորք վարչական շրջանների ընդհանուր իրավասության դատարան է եկել ԱԺ պատգամավոր Նաիրա Զոհրաբյանը:
«Ես այստեղ եմ նախ որպես քաղաքացի, որպես մայր ու որպես պատգամավոր: Անմարդկային սպանություն է տեղի ունեցել, որեւէ անմեղության կանխավարկած չեմ խախտում, իրերը կոչում եմ իրենց անուններով: Բոլոր մեղավորները պետք է անխտիր պատժվեն»,- լրագրողների հետ զրույցում ասաց Նաիրա Զոհրաբյանը: Նա ցինիզմ որակեց պաշտպանների հայտարարությունը, թե տեղի ունեցածն ինքնասպանություն է:
Պատգամավորը նշեց, որ ինքը պարբերաբար է հանդիպում Հայկազ Բարսեղյանի ընտանիքի անդամների հետ ու այսուհետ ինքը կամ «Բարգավաճ Հայաստան» խմբակցությունից մեկ այլ պատգամավոր ներկա են լինելու դատական նիստերին:
Նշենք, որ այսօր դատարան է եկել նաեւ ՀԱյկազ Բարսեղյանի տատիկը: ԴԱտարանում են նաեւ ամբաստանյալների հարազատները:
Հայկազ Բարսեղյանի սպանության համար մեղադրվում են նրա համակուրսեցիները` կուրսանտներ Գնել Թեւոսյանը, Նորիկ Սահակյանը, Վաչե Սահակյանը եւ Մովսես Ազարյանը։ Ըստ մեղադրանքի՝ նրանք հունվարի 29-ին՝ ժամը 02:00-ից 03:00-ի սահմանում, զորամասի ննջարանում դաժանությամբ սպանել են կուրսանտ Հայկազ Բարսեղյանին, ապա հետքերը թաքցնելու նպատակով կախել նրա մարմինը մարզահրապարակում գտնվող պտտաձողից, նրա անունից գրություն թողել, թե իբր ինքնասպան է եղել:
4 կուսանտների դատաքննության հետ քննվում է նաեւ Վարազդատ Սաֆարյանի գործը: Ըստ մեղադրանքի՝ նա 2014թ. նոյեմբերի 16-ին ժամը 21.00-ի սահմանում նույն մարտկոցի կուրսանտ Տ. Մանասերյանին շարքում խոսելու համար դիտողություն անելուց ու նրա կողմից հակադարձում ստանալուց հետո Վաչե Սահակյանի, Մովսես Ազարյանի հետ ծեծի է ենթարկել Մանասերյանին: Բացի այդ՝ 2015թ. հունվարին լսարանում խոսելու համար ծեծի է ենթարկել համածառայող Արտուշ Սիմոնյանին:
