Հայաստանը միշտ եղել է մեր կողքին: Այս մասին, այսօր՝ փետրվարի 5-ին ՀՀ տարածքային կառավարման եւ արտակարգ իրավիճակների նախարար Արմեն Երիցյանի հետ հանդիպման ժամանակ նշել է Հայաստանում Վրաստանի արտակարգ եւ լիազոր դեսպան Թենգիզ Շարմանաշվիլին, ով ավարտում է իր դիվանագիտական առաքելությունը Հայաստանում: Հանդիպմանը մասնակցել է նաեւ Վրաստանի ոստիկանության կցորդ Կամո Գալուստյանը:
Հայաստանի ՏԿԱԻՆ-ից NEWS.am-ին հայտնում են, որ շնորհակալություն հայտնելով դեսպանին 5 տարվա ընթացքում նախարարության հետ արդյունավետ աշխատանքի համար՝ նախարար Երիցյանը շեշտեց, որ դեսպանի առաքելության ավարտով չեն վերջանում ընկերական ջերմ հարաբերությունները երկու երկրների միջեւ՝ ընդգծելով, որ Վրաստան-Հայաստան համագործակցությունը շարունակվելու է նույն բարձր մակարդակում:
Շնորհակալություն հայտնելով ՏԿԱԻ նախարարին՝ դեսպան Շարմանաշվիլին նշեց. «Իմ առաքելության 5 տարիների ընթացքում, երբ Վրաստանում արտակարգ իրավիճակ էր եւ ձեր օգնության կարիքը կար, Հայաստանը միշտ եղել է մեր կողքին, ինչի համար շատ երախտապարտ եմ»: Նշենք, որ արտակարգ իրավիճակների բնագավառում ՀՀ ՏԿԱԻՆ-ի եւ Վրաստանի Հանրապետության համապատասխան կառույցների միջեւ համագործակցությունը հիմնվում է Հայաստանի Հանրապետության կառավարության եւ Վրաստանի Հանրապետության կառավարության միջեւ 1997թ. մայիսի 3-ին Երեւանում ստորագրված «Բնական եւ տեխնածին բնույթի արտակարգ իրավիճակների կանխման ու հետեւանքների վերացման բնագավառում համագործակցության մասին» համաձայնագրի դրույթների վրա:
