Մոսկվայի եւ Համայն Ռուսիո պատրիարք Կիրիլը փետրվարին Կուբայում կհանդիպի Հռոմի պապ Ֆրանցիսկոսին: Այդ մասին Մոսկվայում մամուլի ասուլիսին հայտնել է արտաքին եկեղեցական կապերի բաժնի ղեկավար մետրոպոլիտ Իլարիոն Վոլոկոլամսկին, տեղեկացնում է ՏԱՍՍ-ը:
«Նկատի ունենալով փետրվարի 11-22-ին պատրիարքի այցը Լատինական Ամերիկա եւ միաժամանակ Հռոմի պապի այցը Մեքսիկա, Կուբայում տեղի կունենա նրանց հանդիպումը», - հաղորդել է մետրոպոլիտը:
Մետրոպոլիտի խոսքով, հանդիպումը նախապատրաստվել է 20 տարի: «Հանդիպումը վաղուց էր նախապատրաստվում: 1996 եւ 1997 թվականներին ինտենսիվ բանակցություններ էին ընթանում սրբազան պատրիարք Ալեքսի II-ի հետ հանդիպման կազմակերպման շուրջ», - ասել է մետրոպոլիտը: Սակայն այդ բանակցությունները դադարեցվել են որոշ հարցերի շուրջ պայմանավորվելու հնարավորության բացակայության պատճառով:
Վատիկանի ռադիոն հաղորդել է, որ պատրիարքը եւ Հռոմ պապը համատեղ հռչակագիր կստորագրեն Վատիկանի եւ ՌՈՒԵ-ի ապագա հարաբերությունների վերաբերյալ: