Այսօր Հայաստանի զինված ուժերում միջադեպերն ու արտակարգ դեպքերն այնքան էլ շատ չեն, ուղղակի դրանք չափից դուրս մեծ հանրային արձագանք են գտնում: Հայաստանի Ազգային Ժողովի ամբիոնից հայտարարել է պաշտպանության նախարար Սեյրան Օհանյանը՝ խոսելով ԶՈՒ շարքերում վերջին շրջանում սպանությունների եւ ինքնասպանությունների հաճախակի դարձած դեպքերի մասին:
«Ես չեմ կարծում, թե ստեղծված իրավիճակում ճիշտ էր պաշտպանության նախարարության դեմ նման լայնածավալ արշավ կազմակերպելը»,- դժգոհել է նա: Նախարարի խոսքով, զինվորների մահվան ամեն մի առանձին դեպքում քրեական գործ է հարուցվել: «Զինված ուժերում լուրջ քայլեր են կատարվում՝ կանխելու նման դեպքերը: Ես անձամբ հանդիպում եմ զոհված զինվորների հարազատների հետ՝ կառավարության յուրաքանչյուր նիստից հետո»,- հավաստիացրել է Օհանյանը:
Նա հերքել է նաեւ այն կարծիքը, թե նախարարությունը հակված է զինվորների մահվան դեպքերի մեծ մասը որակել ինքնասպանություն: «Այո, այդպես եղել է միայն սպա Արտակ Նազարյանի մահվան դեպքում, բայց դա եզակի է: Ներկայումս քննություն է ընթանում, եւ ես անձամբ վերահսկում եմ այդ գործը»,- հավաստիացրել է նախարարը:
Խոսելով Youtube-ում տեղադրված տեսագրության մասին, որտեղ երեւում են սպայի կողմից զինվորների նկատմամբ բռնության դեպքեր, նախարարն ընդգծել է, որ չի հավատում այդ տեսագրությանը, որ հայկական բանակում նման դեպքեր են լինում: Օհանյանը հայտարարել է, որ ներկայումս տեսագրությունը գտնվում է մասնագետների փորձաքննության ներքո: «Բայց եթե պարզվի, որ նման դեպք է եղել, նա ով դաժանաբար է վարվել զինվորների հետ, խստորեն պատժվելու է: Ցավոք, մենք դեռ այդ մարդուն չենք գտել»,- ասել է Օհանյանն ու հավելել, որ խստորեն պատժվելու են այդ տեսագրությունները Youtube-ում տեղադրող անձինք:
Սեյրան Օհանյանը նաեւ հերքել է լրատվամիջոցներում տարածված լուրերը իր եւ Յուրի Խաչատուրովի լարված հարաբերությունների մասին: «Խաչատուրովն օրական մի քանի անգամ գալիս է ինձ մոտ, ինչպե՞ս կարող են լարված հարաբերություններ լինել»,- ասել է նախարարը:
Օհանյանն ասել է նաեւ, որ բանակը Հայաստանի նորագույն պատմության ամենամեծ ձեռքբերումներից է: Ըստ նախարարի՝ ԶՈՒ ներկայիս հրամանատարական կազմը արհեստավարժ է, ունի բարձր կրթական ցենզ, գիտի թե դրական, թե բացասական երեւույթների մասին:
