Սիսիանի բժշկական կենտրոնի ծննդաբերական բաժանմունքում 2014թ. հոկտեմբերի 25-ին մահացած հղի Անի Դավթյանի գործով կնշանակվի կրկնակի հանձնաժողովային դատաբժշկական փորձաքննություն: Այս մասին NEWS.am-ի թղթակցի հարցին ի պատասխան հայտնել են Քննչական կոմիտեի տեղեկատվության եւ հասարակայնության հետ կապերի բաժնից:
Նկատի ունենալով, որ Անի Դավթյանի մահվան հանգամանքները պարզելու նպատակով նշանակված հանձնաժողովային երկու փորձաքննությունների եզրակացությունների միջեւ առկա են էական հակասություններ, անհրաժեշտություն է առաջացել նշանակել կրկնակի հանձնաժողովային դատաբժշկական փորձաքննություն:
Վարույթն իրականացնող մարմինն արդեն գրություն է ուղարկել ՀՀ առողջապահության նախարարին՝ առաջարկելով համապատասխան ոլորտի մասնագետներից ստեղծել հանձնաժողով՝ ներգրավվելով նաեւ նախորդ երկու փորձաքննությունների հանձնաժողովների փորձագետներին:
Ավելի վաղ Քննչական կոմիտեն հաղորդել էր, որ դիակի դատաբժշկական փորձաքննության եզրակացության` Անի Դավթյանի մահվան պատճառ է հանդիսացել ներանոթային տարածուն մակարդման ախտանիշը, գլխուղեղի եւ թոքերի այտուցը, որը պայմանավորված է 23-24 շաբաթական հղիությամբ բարդացած մանկաբարձական անամնեզով, նորմալ տեղակայված ընկերքի վաղաժամ շերտազատմամբ, արգանդի պարանոցային հատվածի պատռվածքներով, հյուսվածքների բազմաթիվ ներծծող խոշորօջախային արնազեղումներով, ներքին օրգանների սակավարյունությամբ:
Դատաբժշկական հանձնաժողովային փորձաքննության եզրակացության համաձայն, «Սիսիանի բժշկական կենտրոն» ՓԲԸ-ում Անի Դավթյանի ինչպես հղիության վերաբերյալ տրված ախտորոշումը, այնպես էլ հետծննդյան շրջանում եղել է ճիշտ: Ձեռնարկված բուժմիջոցառումները եղել են դրված ախտորոշումներին համապատասխան եւ ճիշտ: Հետծննդյան շրջանում տեղ գտած բարդությունների պայմաններում Անի Դավթյանի կյանքը փրկելու համար «Սիսիանի բժշկական կենտրոն» ՓԲԸ-ում ձեռնարկվել են անհրաժեշտ հնարավոր բուժմիջոցառումներ, որոնց արդյունքում սակայն կյանքը փրկել չի հաջողվել:
Քրեական գործով տուժողի իրավահաջորդ Ալվարդ Խաչատրյանը, սակայն, Ա. Դավթյանի դատաբժշկական հանձնաժողովային փորձաքննություն եզրակացությունը համարել է չհիմնավորված ու չպարզաբանված եւ միջնորդություն էր ներկայացրել կրկնակի դատաբժշկական հանձնաժողովային փորձաքննություն նշանակելու մասին:
Կրկնակի դատաբժշկական հանձնաժողովային փորձաքննության՝ բժշկական օգնությունը կատարվել է ոչ համապատասխան:
Հիշեցնենք, որ Անի Դավթյանի հարազատները բժիշկներին են մեղադրում կատարվածի մեջ:
Ավելի վաղ Քննչական կոմիտեն հաղորդել էր, որ Անի Դավթյանը հիվանդանոց է տեղափոխվել 2014թ. հոկտեմբերի 24-ին, ժամը 14:00-ի սահմաններում, պտղաջրերի էմբոլիա ախտորոշմամբ, մահացել հաջորդ օրը՝ հոկտեմբերի 25-ին, ժամը 22:05-ի սահմաններում։