1957 թվականի արտադրության մրցարշավային Ferrari-ն ուրբաթ երեկոյան Փարիզում կայացած աճուրդում վաճառվել է 32 մլն եվրոյով: Սա ռեկորդային գումար է Եվրոպայում ավտոմեքենայի վաճառքի համար:
Ferrari 335S Spider Scaglietti-ի համար 10 րոպե շարունակ պայքարել են երկու հոգի: Արդյունքում մեքենան ձեռք է բերել հեռախոսով աճուրդին մասնակցած անանուն գնորդը: Նա Ferrari-ի համար 23 մլն եվրո է առաջարկել, իսկ հարկերի եւ վճարների հետ միասին գումարը շուրջ 32 մլն եվրո կկազմի:
Ըստ Financial Times-ի, Ferrari 335S-ն այսպիսով դարձել է Եվրոպայում վաճառված ամենաթանկ մեքենան՝ փոքր-ինչ զիջելով 2014 թվականին Քալիֆորնիայում սահմանված բացարձակ ռեկորդակրին: Այնտեղ 1962 թվականի Ferrari 250 GTO-ն վաճառվել է 38 մլն դոլարով:
ՌԲԿ-ի փոխանցմամբ, Ferrari 335S-ի նախորդ սեփականատերը ֆրանսիացի կոլեկցիոներ Պիեռ Բարդինոն է:
Financial Times-ը գրում է, որ չնայած եզակի օրինակով թողարկված ավտոմեքենաների վաճառքի ռեկորդներին, դասական մեքենաների շուկան ճգնաժամի մեջ է: Դա արտահայտվում է նրանով, որ կոլեկցիոներները կորցրել են «զանգվածային» համարվող ավտոմեքենաների նկատմամբ հետաքրքրությունը: Այդպիսի մեքենաներից են նաեւ Mercedes Benz SL Pagoda-ն, Jaguar E-Type-ը եւ Porsche 911-ը, որոնք նախկինում մեծ պահանջարկ էին վայելում հին մեքենաների կոլեկցիոներների շրջանում:
