Երեւանում այսօր` փետրվարի 7-ին, մեծ շուքով նշվեց Մեծ Պահքին նախորդող Բուն Բարեկենդանի տոնը (ֆոտոռեպորտաժ)։
Առաջնորդանիստ Սուրբ Սարգիս եկեղեցում ժամը 11:00-ին մատուցվեց Սուրբ պատարագ, որից հետո թեմի երիտասարդները, ազգագրական երգի ու պարի համույթները, Երևանի տարբեր համայնքները ներկայացնող մշակութային խմբերը, Առաջնորդանիստ Սուրբ Սարգիս եկեղեցու մոտից Մաշտոցի պողոտայով տոնական շքերթով շարժվեցին Երեւանի Ազատության հրապարակ:
Նշենք, որ այս պահին Ազատության հրապարակում տեղի են ունենում տարբեր միջոցառումներ` մշակութային ուսումնական հաստատությունների աշակերտների թեմատիկ նկարների ցուցահանդես, ազգային երգ ու պարի կատարումներ, թատերական խմբերի ելույթներ, ազգային խաղեր:
Նշենք, որ Հայ առաքելական եկեղեցին եւ նրա հետևորդները փետրվարի 7-ից մտնում են Մեծ Պահքի շրջան։ Սովորաբար Բարեկենդան է կոչվում շաբաթապահքերի եւ Մեծ պահքի նախընթաց օրը: Բարեկենդանին թույլատրվում են չափավոր վայելքներ, խրախճանքներ, խաղեր եւ ուտեստներ: Բարեկենդան բառացի նշանակում է կենդանություն, բարի կյանք:
Մեծ պահքի բարեկենդանը կոչվում է Բուն Բարեկենդան, քանի որ նախորդում է ամենաերկար պահքին:
