Ադրբեջանը ճանաչում է այդ երկրից բռնի տեղահանված հայերի վերադարձի իրավունքը: Այսօր` սեպտեմբերի 15-ին, Մարդու իրավունքների եվրոպական դատարանում «Սարգսյանն ընդդեմ Ադրբեջանի» գործի քննության ժամանակ, հայտարարել է Ադրբեջանի կառավարության ներկայացուցիչ, այդ երկրի նախագահի աշխատակազմի աշխատակից Չինգիզ Ասգարովը:
Պատասխանելով Ալվինա Գյուլումյանի հարցին, թե Ադրբեջանը ճանաչո՞ւմ է հայ փախստականների վերադարձի իրավունքը նա մասնավորապես ասել է. «Այո: Ադրբեջանի կառավարությունը ճանաչում է հայ փախստականների վերադարձի իրավունքը»:
Հիշեցնենք, որ այսօր ՄԻԵԴ-ում սկսվել է երկու գործի քննությունը: «Չիրագովներն ընդդեմ Հայաստանի» գործով հայցվոր ադրբեջանցի ընտանիքը պնդում է, որ «հայկական օկուպացիայի» հետեւանքով Լաչինում կորցրել է իր տունը, ունեցվածքը եւ զրկվել այն տեսանելի ապագայում օգտագործելու, ժառանգելու կամ զարգացնելու հնարավորությունից, քանի որ Հայաստանի կառավարությունը շարունակում է մերժել նրանց դիմումները` Լաչին վերադառնալու վերաբերյալ:
Մյուսը ներկայացրել է Շահումյանի շրջանի Գյուլիստան բնակիչ Մինաս Սարգսյանի ընտանիքը, որը 1992թ. հունիսին ստիպված է եղել լքել իր հայրենի գյուղը եւ փասխատական դառնալ: Սարգսյանները փոխհատուցում են պահանջում փախուստի ժամանակ իրենց գույքի կորստի համար: Նրանք նշել են, որ Ադրբեջանի Հանրապետությունը պատասխանատվություն է կրում նաեւ գյուղի մշակույթի հուշարձանների, իրենց նախնիների գերեզմանների ավիրման համար:
Նշենք, որ երկու գործով էլ եվրոպական դատարանն, ըստ ընթացակարգի, վճիռ կկայացնի ավելի ուշ: