Այսօր՝ փետրվարի 7-ին, ժամը 17:32-ին տեղեկություն է ստացվել, որ Կոտայքի մարզի Նոր Հաճն քաղաքի կամրջի մոտակայքում ՃՏՊ է տեղի ունեցել: Այս մասին տեղեկացնում է Հայաստանի Տարածքային կառավարման եւ արտակարգ իրավիճակների նախարարությունը:

Պատահարի հետեւանքով տուժած կա: Դեպքի վայր է մեկնել մեկ մարտական հաշվարկ:

Պարզվել է, որ դեռեւս չբացահայտված հանգամանքներում բախվել են «Օպել Աստրա G» մակնիշի (վարորդ՝ 1986թ. ծնված Հ. Ա.), «ՎԱԶ-2106» մակնիշի (վարորդ՝ 1970թ. ծնված Ա. Պ.) եւ «Օպել Աստրա G» մակնիշի (վարորդ՝ 1972թ. ծնված Գ. Բ.) ավտոմեքենաները, ինչի հետեւանքով «ՎԱԶ-2106»-ի վարորդն արգելափակվել է ավտոմեքենայում: 

«Օպել Աստրա G»-ի ուղեւորները՝ 2012թ. ծնված Ա.Ա.-ը եւ 1992թ. ծնված Մ.Մ.-ը տեղափոխվել են Աբովյանի ԲԿ: Տուժածների առողջական վիճակը բժիշկները գնահատել են բավարար:

Հրշեջ-փրկարարներն արգելափակումից դուրս են բերել «ՎԱԶ-2106»-ի վարորդին, որին տեղափոխել են Աբովյանի ԲԿ, այնուհետեւ՝ Երեւանի «Սուրբ Գրիգոր Լուսավորիչ» ԲԿ: Բժիշկները տուժածի առողջական վիճակը գնահատել են ծանր:

Հրշեջ-փրկարարներն ավտոմեքենաները դուրս են բերել ճանապարհի երթեւեկելի գոտուց, հոսանքազրկել եւ փակել գազի բալոնների փականները: