Աշտարակի խճուղում փետրվարի 7-ին, «Նիվա» մակնիշի ավտոմեքենայի հրկիզման դեպքի վերաբերյալ NEWS.am-ին նոր մանրամասներ են հայտնի դարձել։ Պարզվում է՝ նույն օրը երեկոյան Կարմիր խաչի միջազգային վերականգնողական կենտրոնի մոտակայքում անհայտ անձինք ավազակային հարձակում են գործել «Ամարաս-Շին» ՍՊԸ փոխտնօրենի վրա։ Այս մասին NEWS.am-ի հետ զրույցում հաստատեցին ոստիկանությունից։

Նախնական տեղեկություններով՝ Աշտարակի խճուղում, վրացական համարանիշներով «Օպել-Աստրա» մակնիշի  մեքենայում գտնվող անձինք կանգնեցրել են փոխտնօրենի մեքենան, մոտեցել ու դանակի սպառնալիքով գումար պահանջել: Նա դիմադրել է, որի ժամանակ սպառնացողները հարվածել են նրա գլխին, հրկիզել ավտոմեքենան ու դիմել փախուստի:

Ավելի վաղ NEWS.am-ը գրել էր, որ Հայաստանի ՏԿԱԻՆ-ում փետրվարի 7-ին, ժամը 19.01-ին ահազանգ է ստացվել, որ Աշտարակի խճուղում՝ Կարմիր խաչի միջազգային վերականգնողական կենտրոնի մոտակայքում, այրվում է «ՎԱԶ-2121» մակնիշի ավտոմեքենա. կա տուժած:

Դեպքի վայր է մեկնել երկու մարտական հաշվարկ եւ ՃԿԱԿ օպերատիվ խումբը:

Մինչ հրշեջ-փրկարարների կանչի վայր հասնելը՝ վարորդ՝ 35-ամյա Ա. Ա.-ն տեղի ուժերով տեղափոխվել է «Արմենիա» ՀԲԿ:

Հրդեհը մեկուսացվել է ժամը 19.21-ին, մարվել` 19.31-ին: Չավուշի փողոցում` «Արարատ Գոլֆ» ակումբի մոտակայքում, ամբողջությամբ այրվել է «ՎԱԶ-2121» մակնիշի 030 ՍՏ 65 համարանիշով ավտոմեքենան։