Երեւանի Մամիկոնյանց 47 շենքի տանիքից փետրվարի 6-ին ձյունը մաքրելիս ընկած եւ մահացած 52-ամյա Աշոտ Ամիրզյանի բնակարանը շենքի վերջին` 5-րդ հարկում է, քանի որ ձնհալքից ջուրը լցվել է նրա բնակարան, նա բարձրացել է տանիք եւ մաքրել է ձյունը: Այս մասին NEWS.am-ի հետ զրույցում ասաց մահացած տղամարդու հարեւաններից մեկը: Հարեւանի խոսքով, թե ինչպես է եղել դեպքը, ոչ ոք չի տեսել, ըստ էության, Աշոտը բահով մաքրելիս է եղել շենքի տանիքը եւ, հնարավոր է, որ անզգուշաբար ընկել է տանիքից:
«Մեր հարեւան բոլոր շենքերի տանիքներին կան արգելապատնեշներ, բայց մեր շենքի տանիքը չունի, եթե ունենար, հնարավոր է, որ Աշոտը չմահանար: Նա փող էր հավաքում, որ իր բնակարանի առաստաղը վերանորոգի, բայց չհասցրեց»,-ասաց հարեւանը:
Հարեւանի խոսքով, 52-ամյա տղամարդը 4 տարի առաջ էր ամուսնացել, ունի 2-ամյա տղա: Նա մասնագիտությամբ էլեկտրիկ-շինարար էր, տվյալ շենքում ապրել է երկար տարիներ:
Ավելի վաղ տեղեկացրել էինք, որ Երեւանի Մամիկոնյանց 47 շենքի տանիքից, 52-ամյա տղամարդը տանիքի ձյունը մաքրելիս անզգուշաբար ընկել եւ մահացել է:
Գործն այժմ ՀՀ Քննչական կոմիտեի Արաբկիրի քննչական բաժնի վարույթում է: