Ադրբեջանական կողմը երբեք գերիների եւ պատանդների վերադարձի հարցով բանակցություններ չի նախաձեռնել: Այդ մասին հայտնել է Գերիների, պատանդների եւ անհետ կորածների հարցերով Հայաստանի հանձնաժողովի աշխատանքային խմբի ղեկավար Արմեն Կապրիելյանը` NEWS.am-ի թղթակցի խնդրանքով մեկնաբանելով Ադրբեջանի Փախստականների եւ բռնի տեղահանվածների հարցով պետական կոմիտեի ղեկավար Ալի Հասանովի արտահայտությունները:
Ինչպես հաղորդում է haqqin.az-ը` վկայակոչելով ԱՊԱ-ին, Աղդամի` Ադրբեջանի կողմից վերահսկվող հատված այցի ընթացքում Ալի Հասանովը, ի թիվս այլ բաների հայտարարել է. «մենք բազմաթիվ հայ պատանդներ ունենք, առաջարկում ենք նրանց բոլորին փոխանակել» Լեռնային Ղարաբաղում դատապարտված Դիլհամ Ասքերովի եւ Շահբազ Գուլիեւի հետ:
Աշխատանքային խմբի ղեկավարը հիշեցրել է, որ վերջին 6 տարվա ընթացքում հայկական կողմը նպատակաուղղված եղանակով փորձում է հանդիպել ադրբեջանական պետական հանձնաժողովի ներկայացուցիչների հետ` քննարկելու գերիների եւ պատանդների վերադարձի, անհետ կորածների որոնման հետ կապված հարցեր:
«Արժե միջազգային հանրության եւ մարդու իրավունքների եւ միջազգային իրավունքի նորմերի պահպանման հարցերով զբաղվող միջազգային իրավասու կազմակերպությունների ուշադրությունը հրավիրել վերոհիշյալ պաշտոնյայի հնչեցրած հայտարարության ձեւակերպման վրա: «Պատանդ» բառը տվյալ դեպքում նշանակում է քաղաքացիական անձ, որին հակամարտության հակառակորդ կողմը գերի է վերցրել եւ վերջինիս կամքին հակառակ պահում է իր տարածքում: Ուշադրության առնելով այն, որ հարեւան պետության համապատասխան իրավասու իշխանությունները, այդ թվում` պետական հանձնաժողովը, տարիներ շարունակ կտրականապես հերքել են իրենց տարածքում զինվորականների եւ խաղաղ բնակիչների շրջանից պատանդների առկայությունը, ադրբեջանցի պաշտոնյայի հայտարարությունը առավել քան տարօրինակ է հնչում:
Կարծում եմ, որ արժե դրա վրա հրավիրել միջազգային իրավասու կազմակերպությունների ուշադրությունը: Մենք մեր կողմից բոլոր ջանքերը կգործադրենք ադրբեջանցի պաշտոնյայի արտահայտությունների լույսի ներքո տվյալ իրավիճակի համապարփակ ուսումնասիրության համար», - հայտնել է Արմեն Կապրիելյանը:
