Հարկային հաշվառման տվյալների միասնական բազայի ստեղծումը կօգնի Եվրասիական միության անդամ տարբեր հանրապետությունների սուբյեկտների միջեւ ԱԱՀ-ի վերադարձի եւ դուրս գրման կանոնակարգմանը: Այդ մասին փետրվարի 8-ին Մոսկվա-Աստանա-Երեւան մամուլի ասուլիսի ընթացքում լրագրողներին հայտնել է միկրոէկոնոմիկայի եւ ինտեգրացիայի հիմնական ուղղությունների հարցերով Եվրասիական տնտեսական հանձնաժողովի կոլեգիայի անդամ (նախարար) Տատյանա Վալովայան:
Նշենք, որ այժմ ԵԱՏՄ-ի ներսում արտահանվող ապրանքից ԱԱՀ-ի վերադարձը գործում է գործարքին մասնակից գործընկերների իրազեկումների հիման վրա: Հայկական ընկերությունները բողոքում են, որ իրենց հետ գործարք կնքողները կամ ուշացնում են իրազեկումները կամ էլ ուղղակի մոռանում են ուղարկել դրանք (Հայաստանից ապրանքն իրենց հանրապետությունում վաճառելուց հետո): Արդյունքում ձեռնարկատերը զրկվում է ԱԱՀ-ն դուրս գրելու հնարավորությունից եւ ստիպված է այն ամբողջությամբ իր վրա վերցնել:
Համակարգն աստիճանաբար գործածության մեջ է մտնում, մի շարք խնդիրներ լուծվել են, եւ բիզնեսը սովորում է աշխատել նոր կարգի համաձայն: Քննարկվում են դրա հետագա օպտիմալացման հնարավորությունները, հավելել է Վալովայան:
Գաղտնիք չէ, որ Մաքսային, իսկ այժմ Եվրասիական միության անդամ հանրապետությունների համար շատ կարեւոր է չկորցնել հարկային եկամուտը: Այստեղից էլ` ԱԱՀ-ի վերադարձի հստակ համակարգի անհրաժեշտությունը: «Եթե հարկային մարմինների շրջանակում խորացնենք համագործակցությունը, տեղեկատվական միասնական բազաներ ստեղծենք, հնարավոր է` կկարողանանք ավելի թեթեւացնել ԱԱՀ-ի վերադարձի գործընթացը», - հավելել է նախարարը:
Կարգավորելով միասնական տարածքում դեղերի շրջանառութան պրոցեդուրաները եւ դրանց համար միասնական շուկա ստեղծելով` ԵԱՏՄ-ի երկրները կկարողանան դուրս գալ դեղերի արտադրության էապես նոր մակարդակ:
«Ժամանակակից միջազգային ստանդարտների անցումը հնարավորություններ կստեղծի ոչ միայն միության ներսում առեւտրի ընլայնմանը, այլեւ երրորդ երկրներից նոր ներդրումների ներգրավմանը: Դա կօգնի արտահանման մեծ ներուժ ունեցող արտադրանք ստեղծել, այդ թվում նաեւ` միության սահմաններից դուրս արտահանվելու համար», - հավելել է Վալովայան:
