ԱՄՆ-ում ավտոընկերությունները արտադրությունից հանում են փոքր ծավալի կոմպակտ մոդելները նվազող պահանջարկի պատճառով, որը բենզինի գների անկման հետեւանք է։ Այս մասին գրում է USA Today թերթը։

Հյուսիսամերիկյան ավտոշուկայում բենզինի գների նվազման եւ քրոսովերների պահանջարկի աճի համադրությունը ստիպում է դադարեցնել որոշ մոդելների արտադրությունը, որոնք մեծ պահանջարկ չեն վայելում կամ բավականաչափ շահույթ չեն բերում։ Թերթի տեղեկություններով՝ միայն հունվարին ԱՄՆ-ում կոմպակտ մեքենաների վաճառքի ծավալները նվազել են 11.3 տոկոսով այն դեպքում, երբ ամենագնացների եւ քրոսովերների վաճառքն աճել է 10.3 տոկոսով, փոխանցում է ՏԱՍՍ-ը։

Թերթը մեջբերում է Fiat Chrysler ընկերության նախագահ Սերջո Մարկիոնեի խոսքը, ով ավելի վաղ հայտնել էր, որ ընկերությունը մոտ ապագայում կդադարեցնի Dodge Dart սեդանի եւ Chrysler 200-ի արտադրությունը։

Հյուսիսամերիկյան շուկայի մեկ այլ խոշոր խաղացողը՝  Toyota ճապոնական կոնցեռնը, անցյալ շաբաթ հայտնել էր, որ դադարեցնում է  Scion մեքենայի արտադրությունը, որի մոդելների շարժիչի ծավալը չի գերազանցում 2 լիտրը։

USA Today-ը նշում է, որ  մի շարք այլ ընկերություններ մեքենաների արտադրությունը տեղափոխում են Մեքսիկա, ինչը թույլ կտա կրճատել արտադրության արժեքն ու կորուստները՝ փոխհատուցելով եկամտի պակասը։

Ամերիկյան ավտոմոբիլային միության տվյալներով՝ փետրվարի 8-ին ԱՄՆ-ում Regular բենզինի մեկ գալոնը (0.46 լիտր) արժեր 1.74 դոլար։ Մեկ տարի առաջ մեկ գալոն բենզինն արժեր 2.18 դոլար։