«Իսլամական պետություն» ահաբեկչական խմբավորմանը հանցակցության մեջ կասկածվող ռուսաստանցիները Թուրքիայից արտաքսվել են երրորդ երկրներ, օրինակ` Վրաստան կամ Ուկրաինա: Այդ մասին հայտնել է Անկարայում Ռուսաստանի դեսպան Անդրեյ Կառլովը, տեղեկացնում է «ՌԻԱ Նովոստին»:
«Շատ հաճախ Ռուսաստանի քաղաքացիները, որոնք կասկածվում են ԻՊ-ին հանցակցության մեջ, Թուրքիայից արտաքսվել են ոչ թե Ռուսաստան, այլ երրորդ երկրներ, որոնց հետ մենք կամ չունենք դիվանագիտական հարաբերություններ (Վրաստան) կամ էլ հարաբերությունները լարված են (Ուկրաինա): Եթե ԻՊ-ին հանցակցության մեջ կասկածվողն արտաքսվում էր այդ երկրներ, նրան ձերբակալելու մեր հնարավորությունները զրոյի էին հավասարվում», — ասել է նա:
Դեսպանի խոսքով, թուրքական կողմը պնդում էր, որ նման դեպքերում երրորդ երկրներ արտաքսումն իրականացվել է ձերբակալվածների ցանկությամբ:
Կառլովը նաեւ նշել է, որ Թուրքիան օտարերկրյա գրոհայինների` ԻՊ-ին միանալու հիմնական ուղիներից մեկն է:
«Այդ հարցով Ռուսաստանի եւ Թուրքիայի համագործակցությունն ակնհայտորեն ոչ բավարար մակարդակում էր: Հաճախ մենք միայն ԶԼՄ-ներից էինք իմանում, որ օտարերկրացիների խումբ է ձերբակալվել, որոնց մեջ Ռուսաստանի քաղաքացիներ կան», — ասել է Կառլովը:
