2 տարի առաջ տեղի ունեցած սպանության մեջ մեղադրվող, Տավուշի մարզի Թեղուտ համայնքի ղեկավարի որդուն՝ Արագած Թամրազյանին, առաջադրված մեղադրանքը վերաորակվել է:
NEWS.am-ի թղթակցին մեղադրյալի փաստաբան Վաղինակ Գեւորգյանը հայտնեց, որ ՔՕ 104-րդ հոդվածի 2-րդ մասի 6-րդ կետը վերաորակվել է 105-րդ հոդվածի 1-ին մաս:
«Միջնորդել էինք, որ նշանակվի դատահոգեբանական- դատահոգեբուժական փորձաքննություն, որի եզրակացությունից հետո հոդվածը վերաորակվեց՝ հոգեկան խիստ հուզմունքի վիճակում կատարված սպանություն»,- ասաց Վաղինակ Գեւորգյանը՝ նշելով, որ մյուս հոդվածը՝ ՔՕ 185-րդ հոդվածի 1-ին մասը, մնացել է անփոփոխ:
Վաղինակ Գեւորգյանի խոսքով՝ գործով նախաքննությունն ավարտվել է եւ մեղադրական եզրակացությամբ ուղարկվել դատախազին:
Ավելի վաղ Քննչական կոմիտեն հայտնել էր, որ 2013 թ. դեկտեմբերի 24-ին Արագած Թամրազյանն ավտոմեքենայով հետապնդել է իր եղբոր հետ վիճաբանած Նավասարդ Աբգարյանի ավտոմեքենային, որի ընթացքում հրացանից չորս անգամ կրակել է նրա ուղղությամբ: Այնուհետեւ Նավասարդ Աբգարյանը, փոխելով ավտոմեքենայի ուղղությունը, կիսով չափ բարձրացել է մայթ, իջել ավտոմեքենայից եւ որպես հետիոտն անցել ճանապարհի երթևեկելի մաս: Արագած Թամրազյանը շարունակել է հետապնդել նրան եւ կրակել Աբգարյանի ուղղությամբ։ Ստացած հրազենային վնասվածքով վերջինս տեղափոխվել է «Դիլիջանի բժշկական կենտրոն», որտեղ ժամեր անց մահացել է:
Դեկտեմբերի 28-ին Արագած Թամրազյանին մեղադրանք է առաջադրվել եւ հայտարարվել հետախուզում: 2015թ. օգոստոսի 25-ին Թամրազյանը հայտնաբերվել եւ բերման է ենթարկվել ոստիկանություն:
