ԱՄՆ-ի առաջատար իրավաբանական ֆիրմաները 2008 թվականի համաշխարհային ֆինանսական ճգնաժամից հետո շարունակում են տարեկան 3-4 տոկոսով բարձրացնել դրույքները, չնայած ցածր ինֆլյացիային եւ իրավաբանական ծառայությունների նկատմամբ թույլ պահանջարկին, գրում է The Wall Street Journal-ը` վկայակոչելով Citi Private Bank-ի տվյալները:
Որոշ դեպքերում գործընկերների հոնորարները հասնում են ժամը 1500 դոլարի, մինչդեռ մի քանի տարի առաջ ժամը 1000 դոլար գումարը փորձագետներին չափազանց մեծ էր թվում: 1200-ից 1300 դոլար դրույքները գործնականում նորմա են դարձել, բայց հայտնի անունը կամ հազվագյուտ մասնագիտացումը էլիտար իրավաբաններին հնարավորություն են տալիս ժամը 1800 եւ 1950 դոլարի հաշիվ ներկայացնել:
DLA Piper-ի իրավաբան Ջոն Ալտորելլիի խոսքով, որը մասնագիտացած է ֆինանսական իրավունքի մեջ, աշխատանքի մոտավորապես կեսն իրականացվում է ամրագրված վճարով, ոչ թե ժամավճարով: DLA Piper-ը Ալտորելլիի աշխատանքի մեկ ժամվա համար 1500 դոլար է պահանջում, նշում է WSJ-ն:
Ամերիկյան իրավաբանական ընկերություններն անցյալ տարի 4 տոկոսով մեծացրել են իրենց եկամուտը, չնայած իրավաբանական ծառայությունների հանդեպ պահանջարկը մեծացել է ընդամենը 0,5 տոկոսով: Սակայն, չնայած սակագների աճին, իրավաբանների ճնշող մեծամասնության հոնորարները նույնիսկ չեն մոտենում ռեկորդային մակարդակին:
Ամենաթանկարժեք իրավաբանական ընկերությունների թվին են պատկանում Proskauer Rose-ը (գործընկերոջ աշխատանքի մեկ ժամվա համար 1475 դոլար), Ropes & Gray-ը (1450 դոլար) եւ Kirkland & Ellis-ը (1445 դոլար):
Այդ ոլորտում իրավաբանական ընկերության գործընկերոջ աշխատանքի մեկ ժամը 2015-ին հաճախորդների վրա միջինը 875 դոլար էր արժենում, երեք տարվա ընթացքում այդ ցուցանիշն աճել է ավելի քան 27 տոկոսով:
WSJ-ն տեղեկություն էր հավաքում դատական նյութերից, այդ թվում` սնանկացման գործերի վերաբերյալ: Իրավաբանական ընկերությունների մամուլի ծառայությունները հրաժարվել են մեկնաբանել այդ տեղեկությունները, տեղեկացնում է «Ինտերֆաքսը»: