ԱՄՆ-ի Պետդեպի պաշտոնական ներկայացուցիչ Ջոն Քիրբին չի կարողացել հստակ բացատրություն տալ լրագրողի հարցին, որը նրան հիշեցրել է Թուրքիայի նախագահ Ռեջեփ Թայյիփ Էրդողանի խոսքերը Անկարայի եւ քրդերի միջեւ ընտրություն կատարելու անհրաժեշտության մասին, տեղեկացնում է «ՌԻԱ Նովոստին»:
Քիրբին պատասխանել է, որ ԱՄՆ-ը համագործակցում է երկու կողմի հետ էլ:
«Եվ հարցեր չեն կարող լինել: Թուքիայի հետ մենք գործընկերներ ենք: Մենք դաշնակիցներ ենք Թուրքիայի հետ եւ այդպիսին կմնանք: Ոչ մի հարց այստեղ չկա», — ասել է նա:
Ավելի վաղ հաղորդվել էր, որ Թուրքիայի նախագահ Ռեջեփ Թայյիփ Էրդողանը հայտնել է ԱՄՆ-ի կողմից սիրիական քրդերին աջակցության պատճառով Անկարայի եւ Վաշինգթոնի միջեւ վստահության նվազման մասին: Նա քննադատել է ԱՄՆ-ի նախագահի հատուկ դեսպանորդ Բրեթ Մակգուրկի այցը Կոբանի քաղաք, որը վերահսկում է սիրիական քրդերի «Ժողովրդավարական միություն» (ԺՄ) կուսակցությունը:
