Լոռու մարզի Վանաձոր քաղաքում փետրվարի 8-ին բազմոցից ընկած 2-ամյա երեխայի մահվան հանգամանքները պարզելու նպատակով նշանակվել է դատաբժշկական փորձաքննություն: Այս մասին NEWS.am-ին հայտնեցին ՀՀ Քննչական կոմիտեից:
Վանաձորի բժշկական կենտրոնից NEWS.am-ին հայտնեցին, որ երեխան իրենց մոտ է տեղափոխվել արդեն մահացած վիճակում, եւ պարզել, թե մահացու հարվածը մարմնի որ մասին է եղել, հնարավոր չի եղել:
«Մեր մասնաճյուղ չեն բերել, բայց գիտեմ, որ երեխայի դիակն են բերել, հիմա արդեն դատաբժիշկները պետք է պարզեն դա»,-ասաց Վանաձորի բժշկական կենտրոնի մանկական վիրաբույժ Ռուբեն Հակոբյանը:
ՀՀ Քննչական կոմիտեի Լոռու մարզային քննչական վարչությունում նյութեր են նախապատրաստվում դեպքի առնչությամբ:
Ավելի վաղ հայտնել էինք, որ Վանաձորում փետրվարի 8-ին դժբախտ դեպք է տեղի ունեցել: NEWS.am-ին հայտնի էր դարձել, որ 2 տարեկան երեխան խաղալիս ընկել է բազմոցից ու մահացել: Փոքրիկին անմիջապես տեղափոխել էին մոտակա հիվանդանոց, որտեղ, սակայն, կյանքը փրկել չէր հաջողվել: