2016թ. հունվարին սահմանած՝ Ռուբիկի խորանարդը հավաքելու ռեկորդը դրանից մի քանի շաբաթ անց նորից գերազանցել են։ Ամերիկացի տնտեսագետի մշակած համակարգչային համակարգը խորանարդը հավաքել է 0.887 վայրկյանում, հայտնում է Gizmag-ը։
2015թ. նոյեմբերին Զախարիա Գրոմկո անունով ամերիկացի ուսանողի ստեղծած մեքենան Ռուբիկի խորանարդը հավաքել էր 2.39 վայրկյանում։ 2016թ. հունվարին քանզասցի Ջեյ Ֆլեթլենդն ու Փոլ Ռոուզը համակարգչի միջոցով հավաքել էին խորանարդը 0.9 վայրկյանում, փոխանցում է Lenta-ն։
Սակայն տնտեսագետ, ինժեներ Ադամ Բիրի մշակած Sub1 համակարգը գերազանցել է նաեւ այդ ռեկորդը։ Խորանարդը տեղադրում են ռոբոտի մեջ, տալիս «մեկնարկ» հրահանգը։ Վեբ տեսախցիկները ֆիքսում են խորանարդի բոլոր կողմերը եւ տվյալները հաղորդվում համակարգչին, որը օպտիմալ լուծում է գտնում Կոցեմբայի երկֆազ ալգորիթմի միջոցով։ Լուծումը փոխանցում են միկրոպրոցեսորին, որը հրահանգ է տալիս ռոբոտի 6 վերջույթներին։
Խորանարդը հավաքել են 20 քայլից 0.887 վայրկյանում։