«Քաղաքացի-դիտորդ» նախաձեռնության տվյալներով, եթե դեկտեմբերի 6-ի սահմանադրական հանրաքվեի արդյունքները չկեղծվեին, «Ոչ»-ը 53-ից 70 տոկոս ձայն կհավաքեր: Այս մասին այսօր՝ փետրվարի 10-ին, լրագրողների հետ հանդիպմանն ասաց «Թրանսփարենսի Ինթերնեշնլ» հակակոռուպցիոն կենտրոնի փոխտնօրեն Սոնա Այվազյան:
«Մեր դիտարկման արդյունքները ցույց տվեցին, որ հանրաքվեն ուղեկցվեց շատ ավելի կոպիտ խախտումներով, քան նախատեսվում էր: Նույնիսկ մոռացված բռնություններ ի հայտ եկան: Հանրաքվեն իր խախտումներով չի կարելի համարել կայացած: Ոչ գործընթացը, ոչ արդյունքները չեն կարող համարվել լեգիտիմ: «Ոչ»-ը 53-ից 70 տոկոս ձայն կհավաքեր, եթե խախտումներ չլինեին, իսկ Երեւանում՝ 20 տոկոսով ավելի»,-ասաց նա:
Հիշեցնենք, որ դեկտեմբերի 6-ին Հայաստանում կայացել է սահմանադրական հանրաքվե: Պաշտոնական տվյալներով, սահմանադրական փոփոխություններին կողմ է արտահայտվել քվեարկողների 63 տոկոսը: