ԱՄՆ-ի նախագահ Բարաք Օբաման 2017-ի բյուջետային տարվա համար դաշնային ծախսերի 4,1 տրլն դոլարի նախագիծ է ներկայացրել, տեղեկացնում է Reuters-ը: Բյուջետային նոր տարին սկսվում է սեպտեմբերին:
Միաժամանակ կոնգրեսը, որը կազմված է առավելապես հանրապետականներից, արդեն հասկացնել է տվել, որ դեմոկրատ նախագահի նախաձեռնություններից շատերը չեն ընդունվի:
Այսպես, Օբաման առաջարկել է բյուջեի պակասորդն ավելացնել մինչեւ 503 մլրդ դոլար այն դեպքում, երբ անցյալ տարի եկամուտների եւ ծախսերի միջեւ տարբերությունը 439 մլրդ դոլար էր կազմում, տեղեկացնում է Gazeta-ն:
Նախագահը նաեւ առաջարկել է 50 տոկոսով ավելացնել ԻՊ-ի դեմ պայքարի համար ծախսերը եւ GPS ուղղորդմամբ ավելի քան 45 հազար «խելացի ռումբ» գնել:
Բացի այդ, նա առաջարկել է ավելացնել էներգետիկայի նախարարության ծախսերը շրջակա միջավայրի պաշտպանության եւ առողջապահության, ինչպես նաեւ տրանսպորտի զարգացման համար: Միաժամանակ, Օբամայի կարծիքով, անհրաժեշտ է կրճատել գյուղատնտեսության, տիեզերական հետազոտությունների եւ Պետքարտուղարության ծախսերը: