Հայաստանի ձկնաբույծներին ջուրը գրեթե ձրի է տրվում։ Այս մասին փետրվարի 10-ին Արարատյան դաշտի ստորգետնյա ջրերի կառավարման վերաբերյալ USAID ծրագրի (ASPIRED) ներկայացման ժամանակ, ասել է Համահայկական բնապահպանական ճակատի ակտիվիստ Լեւոն Գալստյանը։

Նա խոսքի իրավունք է խնդրել այն բանից հետո, երբ ձկնաբույծները հայտարարել էին, թե Արարատյան դաշտի գյուղերում ջրի պակասի մասին պնդումները սուտ են, եւ իրենք աշխատում են իրենց հնարավորությունների սահմանին։ «Մի քանի  տարի առաջ ձկնաբույծների համար 10 անգամ բարձրացրեցին ստորգետնյա ջրերի սակագները, եւ մենք, միեւնույնն է, դիմանում ենք։ Այնպես որ պետք չէ մեզ ինչ-որ բանում մեղադրել»,- ասել է «Հայաստանի ձկնաբույծների միություն» ՀԿ նախագահ Արմեն Բունիաթյանը։

Գալստանը, դրան ի պատասխան, նշել է, որ վատ չէր լինի հիշել, թե հիմա որքան արժի այդ 10 անգամ թանկացած ջուրը՝ 0,5 դրամ մեկ խորանարդի համար։ «Հասարակ գյուղացին վճարում է 11 դրամ, իսկ դուք՝ 0.5, եւ դեռ բողոքու՞մ եք»,- վրդովվել է ակտիվիստը։