Գյումրու մանկավարժական ինստիտուտի ռեկտոր Վարդեւան Գրիգորյանի եղբոր՝ Հարություն Գրիգորյանի սպանության գործով նշանակվել է կրկնակի դատահոգեբանական փորձաքննություն:
Շիրակի մարզի ընդհանուր իրավասության դատարանում տուժողի իրավահաջորդի ներկայացուցիչներ Թամարա Յայլոյանը և Լիպարիտ Սիմոնյանը միջնորդել էին դատահոգեբուժական և դատահոգեբանական փորձաքննություն նշանակելու մասին:
Փաստաբանները կարծիքով՝ գործում քննվող քրեածին իրավիճակում առավել ցայտուն կերպով առկա են գիտակցված դրդապատճառի և համապատասխան վարքի տիպային դրսևորումներ, քան անսպասելիության պայմաններում առաջացած աֆեկտի հոգեվիճակների հատկանիշեր:
«Նշված հանգամանքներն առավել մանրամասն պարզաբանման կարիք ունեն, ինչը հնարավոր է իրականացնել կրկնակի հոգեբանական փորձաքննության միջոցով»,- ասել են փաստաբանները:
Դատարանը որոշել է միջնորդությունը բավարարել եւ նշանակել կրկնակի դատահոգեբանական ամբուլատոր փորձաքննություն:
Նշենք, որ 2015թ. մարտի վերջին ստացվել էր դատահոգեբանական-դատահոգեբուժական փորձաքննության եզրակացությունը, որի համաձայն՝ ՊՆ Շիրակի մարզի Ռազմական ոստիկանության քրեական հետախուզության բաժնի պետ Արման Կատունյանը դեպքի պահին եղել է հոգեբանական աֆեկտի վիճակում: Եզրակացությունից հետո նրան առաջադրված մեղադրանքը փոխվել է եւ մեղադրանք է առաջադրվել ՀՀ քրեական օրենսգրքի 105-րդ հոդվածով (Հոգեկան խիստ հուզմունքի վիճակում կատարված սպանությունը) եւ 235-րդ հոդվածով (Ապօրինի կերպով զենք կրելը)։
Հիշեցնենք, որ մինչեւ այդ մեղադրանք էր առաջադրվել ՀՀ ՔՕ 104 հոդվածի 1-ին եւ 235 հոդվածի 1-ին մասերով (ապօրինաբար, դիտավորությամբ մեկ ուրիշին կյանքից զրկելը եւ ապօրինի զենք կրելը):
Ավելի վաղ NEWS.am-ը հայտնել էր, որ Շիրակի մարզում 2014թ. hուլիսի 24-ին ժամը 16:00-ի սահմանում, Գետք համայնքի չօգտագործվող ֆերմաներից մեկի տարածքում գտել են Գյումրիի պետական Մանկավարժական ինստիտուտի ռեկտոր Վարդեւան Գրիգորյանի եղբոր՝ Հարություն Գրիգորյանի դին՝ հրազենային վնասվածքով: Կասկածյալը` Արման Կատունյանը, ոստիկանություն էր ներկայացել ինքնակամ եւ խոստովանել մեղքը։
Դրանից հետո քաղաքում լուրեր էին տարածվել, որ Կատունյանը, որը Վարդեւան Գրիգորյանի հարեւանն է, կասկածներ է ունեցել, որ ռեկտորի եղբայրը սիրահետում է իր կնոջը, եւ խանդի հողի վրա է նրան սպանել։