Հայ հասարակության մեջ դեռ բավականաչափ վստահություն չկա ընտրական համակարգի նկատմամբ։ Այս մասին փետրվարի 11-ին կայացած Կառավարության նիստից հետո լրագրողներին ասել է ՀՀ խորհրդարանի աշխատակազմի ղեկավար Հրայր Թովմասյանը։
Նրա խոսքով՝ հենց դա է խանգարում էլեկտրոնային քվեարկության համակարգին անցնելուն։ Նման համակարգերը պետք է վստահության մեծ պաշար ունենան, անցնեն միջազգային աուդիտ եւ երաշխիքներ ստանան հեղինակավոր կազմակերպություններից, ընդ որում, նրանցից, որոնց կընտրի հասարակությունը եւ ոչ թե իշխանությունները, որպեսզի նրանց եզրակացությունները ընտրողների համար կշիռ ունենան։
«Եթե նման «հավատարմագրեր» չլինեն, պետք է մտածենք, թե ինչպես բարելավել ավանդական համակարգը։ Էլեկտրոնային համակարգը կարելի է բաժանել երեք բաղադրիչի. գրանցում, քվեարկություն եւ հաշվարկ։ Էլեկտրոնային գրանցումը եւ ընտրողների նույնականացումը հասարակության անվստահության նկատմամաբ այդքան զգայուն չեն։ Ինչ վերաբերում է բուն քվեարկությանը, ապա կան տարբեր մեխանիզմներ, որոնցից մեկը էլեկտրոնային տերմինալն է՝ քվեարկության մենյուով։ Եվ երրորդը հաշվարկի բաղադրիչն է։ Դրանք «խելացի» քվեատուփեր են, որոնք իրենք են հաշվում ձայները։ Այս 2 համակարգերը կարող են կիրառվել նշված երաշխիքների առկայության դեպքում։ Հակառակ դեպքում գրանցումը կարելի է տեղափոխել էլեկտրոնային ձեւաչափի, իսկ թղթե քվեաթերթիկներն եւ ձեռքով հաշվարկը՝ պահել ինչպես որ կա»,- նշել է Հրայր Թովմասյանը։
Նշենք, որ Հայաստանի նոր Ընտրական օրենսգրքի նախագիծը դեռ պատրաստ չէ։