ՀՀԿ-ն այն եզակի կուսակցությունն է, որն իր վրա է վերցնում ոչ միայն իր մեղքերը, այլեւ ուրիշի «պռավալները»: Այս մասին, այսօր՝ փետրվարի 11-ին, լրագրողների հետ հանդիպման ժամանակ նշել է ՀՀԿ խմբակցության պատգամավոր, «Ազգային միաբանություն» կուսակցության նախագահ Արտաշես Գեղամյանը:
Անդրադառնալով ՀՀԿ-ՀՅԴ համագործակցությանը նա նշել է, որ «փոթորկահույզ այս աշխարհում» յուրաքանչյուր քաղաքական ուժի մտավոր կարողությունները լիարժեք պետք է օգտագործել:
«Ես ողջունում եմ ցանկացած նման կոալիցիա, համագործակցություն: Կարծում եմ՝ նախագահ Սարգսյանը շատ ճիշտ է արել, որ ներգրավել է դաշնակցականների մտավոր ուժը երկրի կառավարման համակարգում: Մենք տվյալ պարագայում ներգրավված ենք Հանրապետական խմբակցությունում, և պատիվ ենք համարում մեզ համար՝ հանուն երկրի մեր ուժերը և գիտելիքները ներդնել»,-ընդգծել է Գեղամյանը:
Հարցին, թե արդյոք այս կոալիցիայով ՀՀԿ-ն չի պատրաստվում ազատվել պատասխանատվությունից, Գեղամյանն արձագանքել է. «Բացարձակապես այդ կարծիքին չեմ, ի տարբերություն ուրիշ կուսակցությունների, ժամանակին եղել եմ խիստ ընդդիմախոսը ՀՀԿ-ի, բայց մի հարցում կարող եմ ասել, որ եզակի կուսակացությունն է, որն ուրիշի «պռավալն» էլ է իր վրա վերցնում: Այսօր եթե ամբողջ վատի համար քննադատվում է ՀՀԿ-ն, բայց ՀՀԿ-ն երբեք չի ասել, որ դաշինք է ունեցել նույն ՀՅԴ-ի, նույն ԲՀԿ-ի հետ, որոնց հետո դաշնակից են եղել, նրանք երբեք չեն մատնանշել որևէ այլ կուսակցության»: