Սյունիքի մարզի Կապան քաղաքի Գործարանային փողոցի պղնձամոլիբդենային կոմբինատի մոտակայքում փետրվարի 10-ին այրված ավտոբուսի 43-ամյա վարորդը ստացել է կրծքավանդակի սալջարդ եւ կողքերի կոտրվածքներ: Այս մասին այսօր՝ փետրվարի 11-ին, NEWS.am-ի հետ զրույցում հայտնեցին Կապանի բժշկական կենտրոնից, որտեղ նախօրեին տեղափոխվել էր Մ.Հ.-ն:
Բժիշկ Նորիկ Հարությունյանը տեղեկացրեց, որ վարորդը այրվածքներ չի ստացել, փոխարենը բազմաթիվ կոտրվածքներ եւ քերծվածքներ է ստացել: Նա ապաքինվում է, նրա ծանր վիճակում նկատվում է դրական տեղաշարժ: Առաջիկայում նրան դուրս կգրեն:
Ավելի վաղ հայտնել էինք, որ Փրկարար ծառայությունը փետրվարի 10-ին, ժամը 16.47-ին ահազանգ է ստացել, որ Սյունիքի մարզի Կապան քաղաքի Գործարանային փողոցի պղնձամոլիբդենային կոմբինատի մոտակայքում այրվում է ավտոբուս: Մինչ հրշեջ-փրկարարների կանչի վայր հասնելը վարորդ՝ 1973 թ. ծնված Մ. Հ.-ին տեղափոխել են Կապանի բժշկական կենտրոն, որտեղ բժիշկները տուժածի առողջական վիճակը գնահատել են բավարար:
Պարզվել է, որ ամբողջությամբ այրվել է «ԲՈՒԱՏ» ՓԲԸ-ին պատկանող «ՊԱԶ» մակնիշի 678 TS 51 պետհամարանիշի ավտոբուսի ներսի հատվածը (մոտ 12քմ): Հրդեհը մեկուսացվել է ժամը 17.00-ին, մարվել` 17.20-ին:
