Մոսկվայում ձերբակալվել է Ադրբեջանի Ազգային անվտանգության նախարարության նախկին աշխատակիցը։ Տղամարդուն մեղադրում են 2.5 մլն ռուբլի յուրացնելու մեջ։

Ռուսաստանի ՆԳՆ կայքում եւ լրատվամիջոցներում հայտնված տեղեկությունների համաձայն՝ Պերվոմայսկոե գյուղում ձերբակալված տղամարդու նկատմամբ Ադրբեջանում կատարած խարդախությունների համար միջազգային հետախուզում էր հայտարարվել։ Ինքը՝ տղամարդը պնդում է, թե ուղղակի կանգնել էր ազդեցիկ մի մարդու ճանապարհին եւ  6 ամիս քննչական մեկուսարանում է անցկացրել։ Ազատության մեջ հայտնվելով՝ նա անմիջապես փախել էր Ռուսաստան, որտեղ պատրաստվում էր քաղաքական ապաստան խնդրել։ Սակայն նա այդպես էլ համապատասխան փաստաթղթեր չէր ներկայացրել, սակայն հայտնվել էր սիրային պատմությունների մեջ։ Հետաքննության տեղեկություններով՝ բարեհամբույր իրավաբանը ծանոթանում էր հարուստ կանանց հետ, ներկայանում որպես հատուկ ծառայությունների աշխատակից, իսկ որոշ ժամանակ անց ժամադրություններին ներկայանում էր 3 տարեկան աղջկա հետ եւ սկսում էր սրտաճմլիկ պատմություններ պատմել՝ ֆինանսական օգնություն ստանալու հույսով։ Որպես կանոն՝ կանայք չէին մերժում։ Տղամարդուն ձերբակալել են, իսկ նրա աղջկան ուղարկել բուժհաստատություն՝ հետագայում Ադրբեջան ուղարկելու եւ հարազատներին փոխանցելու նպատակով։

Ձերբակալվածի անունը հայտնի չէ։ Սակայն haqqin.az կայքին հաջողվել է պարզել, որ ձերբակալվածը ԱԱՆ Նախիջեւանի բաժնի աշխատակից Իբրահիմ Մուսաեւն է, ով հայտնի է ադրբեջանական հատուկ ծառայությունների մասին մերկացնող հայտարարություններով։