Ղարաբաղյան գործընթացում հայկական կողմը հետընթաց է արձանագրել, որի ակնհայտ ապացույցը Մադրիդյան փաստաթղթերն են, որտեղ որպես Լեռնային Ղարաբաղի միջանկյալ կարգավիճակ ենթադրվում է միայն ինքնավարությունը, եւ մատնանշվում Ղարաբաղի շուրջ «օկուպացված տարածքների» վերադարձի անհրաժեշտությունը: NEWS.am-ի թղթակցի հետ զրույցում նման կարծիք է հայտնել Դաշնակցության Գերագույն մարմնի ներկայացուցիչ, ԱԺ արտաքին հարաբերությունների հանձնաժողովի նախագահ Արմեն Ռուստամյանը:
Նրա պնդմամբ, այսօր բանակցություններում ակտիվ գործընթացներ են գնում: «Նման միջազգային ակտիվություն ղարաբաղյան գործընթացի շուրջ չի եղել, ինչպես այսօր է, եւ դա պայմանավորված է Անկարայի հետ հարաբերությունները կարգավորելու Երեւանի նախաձեռնությամբ»,- նկատել է նա: Ըստ Ռուստամյանի՝ ղարաբաղյան գործընթացում կողմերը նոր փուլ են մտել, խաղաղության հարկադրման փուլը: «Այսօր կողմերը գտնվում են ԵԱՀԿ Մինսկի խմբի ճնշման տակ՝ այս կամ փաստաթղթի ստորագրման հարցում»,- նկատել է արտաքին հարաբերությունների հանձնաժողովի նախագահը:
