Ամերիկյան Վիրջինիայի նախկին նահանգապետ, Հանրապետական կուսակցությունը ներկայացնող Ջիմ Գիլմորը դուրս է եկել ԱՄՆ նախագահի պաշտոնի համար մրցավազքից: Այս մասին հաղորդում է ՏԱՍՍ-ը՝ վկայակոչելով քաղաքական գործչի հայտարարությունը:
Միաժամանակ Գիլմորը խոստացել է, որ կշարունակի պայքարել իր գաղափարների համար եւ ջանքեր կգործադրի, որպեսզի պետության հաջորդ ղեկավարը հանրապետական լինի, ոչ թե «նա, ով խոստանում է շարունակել Օբամայի աղետալի քաղաքականությունը»:
2008 թվականին Գիլմորն արդեն հայտարարել էր իր նախագահական հավակնությունների մասին, սակայն ներկուսակցական պայքարի փուլում զիջել էր սերնատոր Ջոն ՄաքՔեյնին: Վիրջինիայի նահանգապետի պաշտոնը նա զբաղեցրել է 1998-2002 թվականներին:
Ներկայումս նախագահի պաշտոնին հավակնում է 6 հանրապետական թեկնածու՝ միլիարդատեր Դոնալդ Թրամփը, Թեքսասը ներկայացնող սենատոր Թեդ Քրուզը, Ֆլորիդան ներկայացնող սենատոր Մարկո Ռուբիոն, Ֆլորիդայի նախկին նահանգապետ Ջեբ Բուշը, Օհայոյի նահանգապետ Ջոն Քեյսիքը, սեւամորթ նեյրովիրաբույժ Բեն Քարսոնը:
