Արագածոտնի մարզի Արագածավան գյուղում երկու անձի սպանության մեջ մեղադրվողի ազգականների գույքը վնասելու ու հրկիզելու գործով մեղադրյալ կա, նրա նկատմամաբ որպես խափանման միջոց է ընտրվել ստորագրությունը չհեռանալու մասին: Այս մասին այսօր՝ փետրվարի 13-ին, NEWS.am-ը տեղեկացավ Քննչական կոմիտեի մամուլի ծառայությունից, որտեղից հրաժարվեցին հրապարակել մեղադրյալի անուն ազգանուն:
Ավելի վաղ ոստիկանությունը հաղորդել էր, որ Արագածոտնի մարզի Արագածավան գյուղում երկու անձի սպանության մեջ մեղադրվողի ազգականների գույքը, ըստ նախնական տեղեկությունների, վնասել ու հրկիզել է սպանված Արտյոմ Խամոյանի եղբայր Աշոտ Խամոյանը:
Նշենք, որ, ըստ Ոստիկանության, Արտյոմ Խամոյանին եւ Վարգդես Գալստյանին մահացու հրազենային, Արման Խամոյանին հրազենային վնասվածք պատճառելու մեղադրանքով կալանավորվել է Արագածավան գյուղի բնակիչ, 35-ամյա Սեդրակ Ղազարյանը:
Նշենք, որ, տարածված լուրերի համաձայն, Սեդրակ Ղազարյանը եւ Խամոյանները վաղեմի թշնամություն են ունեցել: Սպանությամբ ավարտված վիճաբանությունը ծագել է խոտի դեզը հրկիզելու պատճառով:
Հիշեցնենք, որ 2016թ. փետրվարի 3-ի ուշ երեկոյան Արագածավանում սպանվել էին 40-ամյա Արտյոմ Խամոյանն ու 49-ամյա Վարդգես Պետրոսյանը, իսկ Արտյոմ Խամոյանի եղբայրը՝ Արման Խամոյանը տեղափոխվել էր հիվանդանոց: Սպանության կասկածանքով ձերբակալվել էր նույն գյուղի բնակիչ Սեդրակ Ղազարյանը:
Ողբերգության շարունակությունը կանխելու նպատակով դեպքից հետո Արագածավանում ուժեղացված հսկողություն են իրականացնում ոստիկանական ուժերը։ Գյուղ մտնող բոլոր մեքենաները ստուգվում են: