Ադրբեջանում կալանավայրերը շարունակում են բանտարկյալների սպանդանոցների վերածվել:
Ինչպես հայտնում է minval.az-ը, փետրվարի 12-ին համար 6 քրեակատարողական հիմնարկում պատժիչ հաստատության աշխատակիցները ծեծելով սպանել են 2 բանտարկյալի, եւս երկուսը ծանր վիճակում տեղափոխվել են հիվանդանոց: Մյուս երկու բանտարկյալների ճակատագրի մասին ոչինչ հայտնի չէ:
Բանտարկյալների մահվան փաստը հաստատել է մահացածներից մեկի եղբայրը: Ռամին Իբրահիմովի խոսքով՝ իրեն զանգահարել են ու հայտնել, որ իր եղբայրը մահացել է որովայնի հատվածում ցավերից, եւ նրա մարմինը դիահերձարանում է: «Մենք գնացինք եւ տեսանք, որ նրա ոտքերը կոտրված են, թաթերը՝ սեւացած, իսկ թոքերը՝ պատռված: Եթե եղբայրս մեղավոր էր, նրան պետք է պատժեր օրենքը»,- ասել է Իբրահիմովը:
Նրա խոսքով՝ մեկ այլ բանտարկյալի մարմինը տեղափոխել են Գյանջա: «Սահիբ Աբասովին նույնպես սպանել են: Նրա մարմինը տարել են Գյանջա: Մյուս երկու բանտարկյալները ծանր վիճակում հիվանդանոցում են: Մնացած երկուսի մասին ոչինչ հայտնի չէ»,- ասել է նա:
ՔԿՀ մամուլի ծառայությունից հրաժարվել են մեկնաբանություններ տալ:
Նշենք, որ Ադրբեջանի բանտերում սա բանտարկյալների սպանության առաջին դեպքը չէ: 2014թ. դեկտեմբերի 22-ին Ղարադաղի շրջանի համար 14 բանտում մահացել էր էլշադ Բաբաեւը: Հետո պարզվել էր, որ 31-ամյա Բաբաեւը մահացել էր խոշտանգումներից:
