Մենք դեմ չենք միջազգային եւ տարածաշրջանային կազմակերպություններում ղարաբաղյան հակամարտությունը քննարկելուն։ Այս մասին Turan –ին եւ «Ամերիկայի ձայնին» տված հարցազրույցում ասել է ԵԱՀԿ ՄԽ ամերիկացի համանախագահ Ջեյմս Ուորլիքը՝ անդրադառնալով ԵԽԽՎ-ում ներկայացված 2 բանաձեւերին։
«Մենք պաշտպանում ենք այդ հարցը ցանկացած կերպ բարձրացնելու Ադրբեջանի եւ Հայաստանի իրավունքը։ Համանախագահները շեշտում են, որ ՄԽ բանակցային ձեւաչափն ուժի մեջ է մնում։ Մենք հույս ունենք, որ բանակցությունների միջոցով հակամարտության կարգավորման համար Հայաստանն ու Ադրբեջանը հավատարիմ կմնան իրենց պարտավորություններին եւ կշարունակեն ՄԽ-ի հետ սերտ համագործակցությունը»,- ասել է միջնորդը։
Նրա խոսքով՝ միջնորդները խաղաղության տանող միակ ուղին բանակցություններն են համարում։
«Երկարաժամկետ կարգավորման հասնելու համար մեր բանակցությունները հիմնվում են միջազգային իրավունքի՝ ՄԱԿ կանոնակարգի, Հելսինկիի եզրափակիչ ակտի, տարածքային ամբողջականության սկզբունքների, ինքնորոշման եւ ուժ չկիրառելու որոշումների վրա։ Հակամարտության համապարփակ կարգավորման մաս է հանդիսանում օկուպացված տարածքները Ադրբեջանին վերադարձնելը եւ Լեռնային Ղարաբաղի կարգավիճակի սահմանումը»,- մեջբերում է պարբերականը Ուորլիքին։
Նա նշել է նաեւ, որ կողմերը եւ համանախագահները համակարծիք են, որ կարգավորման հիմնական տարրերը հիմնվում են Մադրիդյան սկզբունքների վրա։ Նշված սկզբունքների վրա հիմնված առաջարկները ներկայումս քննարկում են կողմերն ու համանախագահները։
