ՀԱԿ-ի հրավիրած հանրահավաքում գլխավոր դատախազի նախկին տեղակալ, նախկին քաղբանտարկյալ Գագիկ Ջհանգիրյանն անդրադարձել է հայոց բանակում վերջին ամիսներին տեղի ունեցող դեպքերին: Նա իր խոսքում, մասնավորապես, նշեց. «Բանակը ՀԱԿ-ի համար շատ զգայուն թեմա է. Կոնգրեսի առաջնորդը հայկական բանակի շինարարն է եւ Լեւոն Տեր-Պետրոսյան գերագույն գլխավոր հրամանատարի օրոք է հայոց բանակը կռել իր հաղթանակները:
Ինձ համար բանակի թեման առավել նուրբ ու բարդույթավորված է նրանով, որ 10 տարի աշխատել եմ բանակի հետ, ծանոթ եմ բանակաշինության առաջընթացին ու դրականին, տիրապետում եմ բանակային կյանքի բոլոր կողմերին: Սակայն այն, ինչին ականատես ենք վերջին ամիսներին, գրեթե ամեն օր, երբեմն դուրս է նույնիսկ ամեն ինչ տեսած մարդու երեւակայությունից»:
«Երբեւէ չէի կարող պատկերացնել, որ հայ զինվորի պատիվն ու կյանքը կարող է այդքան արժեզրկվել, որ զինվորին կարող են ռեժիմով ծեծել ու ստորացնել, թքել նրա զինվորական արժանապատվության վրա եւ դրանից հաճույք ստանալ (նկատի ուներ youtube-ում տեղադրված հայտնի տեսանյութը)»,- ասաց Ջհանգիրյանն ու հավելեց. «Ճիշտ է, հակառակորդը շփման գծում ավելացել է, բայց մենք նման իրավիճակներ տեսել ենք: Իսկ խնդիրը ոչ թե հակառակորդն է, այլ կրիմինալի սանձարձակությունն ու ամենաթողությունը»:
Տեղի ունեցած դեպքերը նա կապեց մարտի 1-ի դեպքերի հետ, նշելով, որ «հենց մարտի 1-ի ամենաթողության պատճառով է, որ սեփական ժողովրդի վրա մահակ ու զենք բարձրացրած սպան արդեն իր գիտակցության մեջ հայրենիքի պաշտպանից վերածվել է քրեական հանցագործի ու մարդասպանի»: Նա նաեւ նշեց, որ բանը հասել է այնտեղ, որ նույնիսկ սպան է ինքնասպան լինում, չկարողանալով դիմանալ ստեղծված վիճակին: «Անկիրթ, վայրենի ու բռի հրամանատարները շարունակելու են առիթ-անառիթ ծեծել, խոշտանգել եւ սպանել հայ զինվորին, չհասկանալով, թե դա ինչու է արգելված, քանի որ իրենց դաստիարակությամբ այս երկիրն ու ժողովուրդը խանի սեփականությունն են, իրենք էլ` խանի վերակացուները: Ո՞վ է տեսել վերակացուին արգելեն խանի հպատակներին ծեծել»,- իր խոսքն ամփոփեց նա:
