Ադրբեջանական կողմը հերթական ապատեղեկատվությունն է տարածում՝ իրենց սխալը կամ ձախորդությունը վերագրելով չար հայերի դավադիր ջրին: Այս մասին ասել է ԼՂՀ վարչապետի մամուլի խոսնակ Արտակ Բեգլարյանը՝ NEWS.am-ի թղթակցի խնդրանքով մեկնաբանելով ադրբեջանական լրատվամիջոցներում հայտնված տեղեկություններն այն մասին, թե իբր Սարսանգի ջրամբարից բաց թողած ջրի պատճատով փլուզվել է կամուրջը։
«Իրականում Սարսանգի ՀԷԿ-ի գործունեության ռեժիմը ոչ մի փոփոխություն չի կրել վերջին ամիսներին, եւ ամեն օր Սարսանգից բաց է թողնվում վայրկյանում միջինը 20 խորանարդ մետր ջուր, որը շատ հեռու է կամուրջ քանդելու ծավալից: Ավելին՝ հասարակ տրամաբանությունը հուշում է, որ եթե նույնիսկ մենք մեծ ծավալի ջուր բաց թողնենք ինչ-ինչ նպատակներով, ապա այն կվնասի մեր ՀԷԿ-ի սարքավորումները, որոնք նախատեսված են նշածս միջին ծավալի համար: Հետեւաբար, ուղղակի բացառվում է այդ սցենարը, թող պատճառը որոնեն իրենց մոտ, եթե, իհարկե, այդ կամուրջը քանդվել է իրականում:
Ի դեպ, այս տեղեկատվությամբ ադրբեջանական կողմը եւս մեկ անգամ խոստովանեց, որ Արցախը, այնուամենայնիվ, Սարսանգի ջրի ելքն ամբողջովին չի փակում եւ տարվա ընթացքում հսկայական ծավալի ջուր է տրամադրում իրենց: Իսկ եթե ամառվա սեզոնին էլ են ցանկանում ջուր ունենալ, ապա Խորհուրդ կտայի ողջախոհ գտնվել եւ համագործակցել Արցախի Հանրապետության հետ, ինչը փոխշահավետ է երկու կողմերի բնակիչների համար: Հիշեցնեմ, որ եթե Ադրբեջանի գյուղացիները տարեկան 8-9 ամիս ջուր են ստանում Սարսանգի ջրամբարից, ապա մեր գյուղացիները նույնիսկ մեկ օր չեն ստանում, քանի որ Ադրբեջանը փակ է պահում ջրանցքի՝ իրենց տարածքում գտնվող հանգույցը»,-ասել է Արտակ Բեգլարյանը։
Հիշեցնենք, որ ԱՊԱ գործակալությունը հայտնել էր, թե Այրիջա գյուղում Սարսանգի ջրամբարից ջրի բացթողնման հետեւանքով գետի ջրի մակարդակի բարձրացման պատճառով կամուրջ է փլուզվել։