Երեւանի Էրեբունի եւ Նուբարաշեն վարչական շրջանների ընդհանուր իրավասության դատարանն այսօր՝ մարտի 30-ին, մերժեց ցմահ դատապարտյալ Արթուր Մկրտչյանի բողոքը, որով պահանջում էր անվավեր ճանաչել բջջային հեռախոս պահելու համար իրեն վարչական տույժի ենթարկելու մասին որոշումը:
Նիստից հետո լրագրողների հետ զրույցում 5 ծառայակիցներին սպանելու համար ցմահ ազատազրկված Արթուր Մկրտչյանի փաստաբան Ռոբերտ Ռեւազյանը հայտնեց, որ պատրաստվում են բողոքարկել դատարանի կայացրած որոշումը:
Նշենք,որ ցմահ ազատազրկված Արթուր Մկրտչյանի նկատմամ կալանավայրում բջջային հեռախոս պահելու համար սահմանվել է վարչական տույժ եւ դրա հետեւանքով նա 5 տարով զրկվել է վաղաժամկետ ազատման համար դիմելու իրավունքից:
Հիշեցնենք, որ Արթուր Մկրտչյանը 1997 թ. դատապարտվել է մահապատժի, որն այնուհետեւ փոխարինվել է ցմահ ազատազրկմամբ: Արթուրը պնդում է, որ անմեղ է, ծառայակիցներին սպանել են իրեն անծանոթ մարդիկ, որոնք դեպքի օրը իր հետ եղել են մարտական հենակետում, որտեղ կատարվել է սպանությունը:
