Ադրբեջանական ուղղաթիռներից մեկը հայ զինծառայողը ոչնչացրել է նռնականետով: Այս մասին նա պատմել է Հանրային հեռուստաընկերության պատրաստած ռեպորտաժում:
«Պոստում կանգնած էի, տեսել եմ, որ ուղղաթիռը գալիս է մեր ուղղությամբ: Կրակեց, ես էլ կրակեցի»,- պատմել է հայ զինծառայող Նարեկ Մալխասյանը:
Նրա ընկերները հայտնել են, որ Նարեկի հանգստի ժամն է եղել, սակայն երբ լսել է ընկերների գոռոցը, թե ուղղաթիռ է մոտենում, անմիջապես դուրս է եկել բլինդաժից եւ անմիջապես հարվածել ուղղաթիռին:
Հիշեցնենք, որ ապրիլի 2-ից գիշերը իրավիճակը Լեռնային Ղարաբաղի հակամարտության գոտում կտրուկ լարվել է։ Պարբերաբար կրակոցներից եւ մասնակի դիվերսիոն հետախուզական փորձերից Ադրբեջանն անցում է կատարել մասշտաբային հարձակման շփման գծի ողջ երկայնքով՝ օգտագործելով հրետանի, ծանր տեխնիկա եւ ավիացիա։ Սրանք ամենախոշոր գործողություններն են 1994 թվականին հաստատված հրադադարի ռեժիմից հետո, որոնք ձեռնարկել է Ադրբեջանի զինուժը: Երկու կողմերից էլ կան զոհեր։
