Հայտնի ֆուտբոլային փորձագետ, Спорт-экспресс կայքի նախկին գլխավոր խմբագիր Արթուր Պետրոսյանը, որն անգլիական «Լիվերպուլի» մոլի երկրպագու է, Եվրոպայի լիգայի քառորդ եզրափակչի «Բորուսիա» Դ – «Լիվերպուլ» խաղից առաջ NEWS.am-ի թղթակից Վերա Մարտիրոսյանի հետ զրույցում պատմեց, թե ինչ մթնոլորտ է այս պահին Դորտմունդում:
«Հավատացեք, ես երբեք ոչ մի երկու այլ թիմերի միջեւ այսպիսի ընկերական հարաբերություններ չեմ տեսել, ինչպես այսօր տեսնում եմ «Լիվերպուլի» ու «Բորուսիա» Դորտմունդի միջեւ: Այս թիմերին միավորում է ոչ միայն «Լիվերպուլի» ներկայիս եւ «Բորուսիայի» նախկին մարզիչ Յուրգեն կլոպը, այլեւ նույն օրհներգը՝ You will never walk alone. Սպասվում, էր որ այսօր այդ լեգենդար ստեղծագործության ամենաուժեղ կատարումն է լինելու, քանի որ ամբողջ ստադիոնը պատրաստվում է երգել այն:
Դորտմունդ են ժամանել հազարավոր երկրպագուներ Լիվերպուլից: Նրանք շատ լավ են տրամադրված եւ ընդունում են, որ այս խաղում ֆավորիտը «Բորուսիան» է: Մխիթարյանին այստեղ շատ են սիրում: Վիճակագորթւոյւնը ամեն ինչ ասում է՝ 26 գոլային փոխանցում եւ 20 գոլ՝ Եվրոպայի լավագույն ֆուտբոլիստներից մեկի ցուցանիշն է: Իհարկե, «Լիվերպուլը» շատ կցանկանա ունենալ նրա նման ֆուտբոլիստ, բայց այս պահին ավելի շատ խոսվում է Մարիո Գյոթցեի հավանական տեղափոխության մասին:
Յուրգեն Կլոպին այստեղ հիանալի դիմավորեցին: Ես երեկ քաղաքի կենտրոնից ոտքով քայլեցի դեպի մարզադաշտ: Շատերի լուսամուտներից կախված էր Կլոպին շնորհակալություն հայտնող պաստառներ: Թիմի աշխատակիցները նույնպես մեծ ոգեւորությամբ դիմավորեցին Կլոպին: Անգամ ծիծաղելի ցուցանակ էին պատրաստել նրա համար, թե որտեղ է Կլոպի հանդերձարանը, որպեսզի նա հանկարծ չշփոթվի եւ գնա «Բորուսիայի» հանդերձարան»- ասաց Պետրոսյանը:
Հիշեցնենք Եվրոպայի լիգայի քառորդ եզրափակիչ «Բորուսիա» Դ – «Լիվերպուլ» խաղը տեղի կսկսվի այսօր, ժամը 23.05-ին:
Վերա Մարտիրոսյան