Այսօր` սեպտեմբերի 24-ին կառավարության նիստի ընթացքում բավական արտառոց եւ համարձակ հայտարարություն արեց վարչապետ Տիգրան Սարգսյանը։ Նա ասաց, որ Հայաստանում սիգարետը շատ էժան է, եւ կառավարությունը ցանկանում է ակցիզային հարկը բարձրացնելով՝ թանկացնել սիգարետը եւ այդ ձեւով պայքարել ծխելու դեմ։ Հաշվի առնելով, որ Հայաստանի չափահաս բնակչության համարյա կեսը ծխում է, վարչապետի այս հայտարարությունը կարելի է լուրջ մարտահրավեր համարել հասարակության բավական լայն զանգվածներին։

Վարչապետի տվյալներով՝ Հայաստանը այլ երկրներից շատ առաջ է նաեւ հիվանդների քանակով, ինչը հետեւանք է նաեւ ծխախոտամոլության։ Նա չբացառեց այն տարբերակը, որ սիգարետի ակցիզից ստացված միջոցները կուտակվեն հատուկ հիմնադրամում եւ օգտագործվեն ծխելու դեմ պայքարի համար։ Սակայն կարծում ենք՝ այս տարբերակը քիչ հավանական է։

Նշենք, որ սիգարետի ակցիզների բարձրացման որոշում կայացվել է նաեւ Ռուսաստանում, ուր 2011 թ. սպասվում է սիգարետների գրեթե կրկնակի թանկացում։

Եվրամիության երկրներում յուրաքանչյուր տուփ սիգարետից ակցիզը կազմում է նվազագույնը 600 դրամին համարժեք: Հայաստանում 1 տուփ սիգարետի ակցիզը սկսում է 39 դրամից։