Իսրայելի իշխանությունները քաղաքացիներին զգուշացրել են Թուրքիայում նոր ահաբեկչությունների անմիջական սպառնալիքի մասին՝ կրկին այդ երկրում գտնվողներին կոչ անելով անհապաղ հեռանալ, իսկ մյուսներին՝ խուսափել Թուրքիա այցելությունից:
Իսրայելի Ազգային անվտանգության խորհրդին առընթեր հակաահաբեկչական գրասենյակը, ըստ էության, կրկնել է երեք շաբաթ առաջ հրապարակած հայտարարությունը, երբ Թուրքիայում Անկարայում եւ Ստամբուլում տեղի ունեցած պայթյուններից հետո վտանգավորության երկրորդ աստիճան հայտարարվեց, ինչը «հստակ սպառնալիք» է նշանակում:
«Այդ երկրում ահաբեկչությունների անմիջական վտանգ կա: Մենք ընդգծում ենք, որ այդպիսի վտանգ առկա է Թուրքիայի զբոսաշրջային բոլոր օբյեկտներում»,- ասված է մամուլի հաղորդագրությունում:
Ըստ ՌԻԱ Նովոստիի, հրեական Պեսախ տոնի նախօրեին, որը հազարավոր իսրայելցիների ավանդական տոնում են արտասահմանյան ճամփորդություններով, իշխանությունները հերթական անգամ քաղաքացիներին կոչ են արել խուսափել Թուրքիա այցելությունից: