Ապրիլի 12-ին տեղի կունենան Չեմպիոնների լիգայի քառորդ եզրափակչի երկու հանդիպումներ. «Ռեալը» տանը կընդունի «Վոլսբուրգին», «Մանչեսթեր սիթին»` ՊՍԺ-ին:
«Ռեալը» չպետք է գոլ բաց թողնի
Գերմանիայում տեղի ունեցած խաղն անակնկալ էր, քանի որ արքայական ակումբը բաց թողեց երկու գնդակ եւ չխփեց ոչ մի գոլ: Ընդանրապես, «Ռեալը», բացի վերջին երկու տարիներից, գերմանական թիմերի հետ դրսում խաղալիս միշտ էլ դժվարություններ է ունեցել: Մասնագետների մեծ մասը հակված է այն մտքին, որ Զիդանի թիմը չի պարտվի տանը, իսկ ահա «Ռեալի» նախկին մարզիչ Կարլո Անչեոտին կարծում է, որ «Ռեալը» կարող է դուրս մնալ Լիգայից:
Խաղից առաջ «Վոլսբուրգի» կիսապաշտպան Անդրե Շյուրլեն ասել է, որ թիմը խաղալու է իր հնարավորությունների «100 միլիոն տոկոսով»: Եթե հանկարծ «Վոլսբուրգին» հաջողվի մեկ գոլ խփել, ապա «Ռեալը» պետք է արդեն չորս գոլ խփի: Դրա համար այս դիմակայությունում հենց սկիզբից սպասել բաց խաղի չարժե: Զիդանը նախախաղային ասուլիսի ժամանակ ասել է, որ այս խաղը չեն հաղթելու 10-15 րոպեների ընթացքում: Իր հերթին «Վոլսբուրգի» մարզիչ Դիտեր Հեկինգը նշել է, որ անելու են ամեն բան պատմության մեջ մտնելու համար: Եթե «Ռեալը» Իսպանիայում դեռ չեմպիոնության հույսեր ունի, ապա «Վոլսբուրգի» համար ամեն բան ավարտված է Բունդեսլիգայում: Ամենայն հավանականությամբ եկող տարի նրանք Եվրոգավաթներում հանդես չեն գա:
«Ռեալի» համար ամենամտահոգիչ հարցը Քարիմ Բենեզեմայի մասնակցություն էր, սակայն սկանդալային ֆրանսիացին պատրաստ է: «Ռեալը» Չեմպիոնների լիգայի այս մրցաշրջանի 18 տնային խաղերից 16-ում տարել է հաղթանակ: Դրա համար կարծում եմ` այսօր էլ արքայական ակումբը կանցնի հաջորդ փուլ: Խաղի հավանական հաշիվը 3:0
Անկանխատեսելի խաղ Անգլիայում
Այսօրվա մյուս դիմակայությունը տեղի կունենա Մանչեսթերում: «Էտիհադ» մարզադաշտում ֆրանսիական ՊՍԺ-ն, որն առաջին հանդիպման ֆավորիտն էր, կփորձի պատմության մեջ առաջին անգամ մտնել Չեմպիոնների լիգայի կիսաեզրափակիչ, մինչդեռ «Սիթին» էլ առաջին անգամ է խաղում քառորդ եզրափակչում, իսկ ֆրանսիական թիմը չորրորդ տարին անընդմեջ հայտնվում է այս փուլում:
Դրսում խփած երկու գոլերը փոքր առավելություն են տալիս անգլիացիներին, թեեւ բուքմեյքերները ավելի շատ հավատում են ՊՍԺ-ին: Լորան Բլանի թիմն ունի մեծ կորուստներ, չեն խաղալու Դավիդ Լուիսն ու Բլեզ Մաթուիդին, ինչպես նաեւ նախորդ հանդիպումը բաց թողած Մարկո Վերատին եւ Խավիեր Պաստորեն: Անգլիացիների մոտ չկա Վենսան Կոմպանին: Եվ դրանով ամեն ինչ ասված է, ինչպես նաեւ Ռախիմ Ստերլինգը: Հարցականի տակ է նաեւ Յայա Տուրեի մասնակցությունը:
Խաղից առաջ թիմերի մարզիչները հույս հայտնեցին, որ իրենց թիմերը կհաղթեն: Լորան Բլանը ասաց, որ վերլուծել են նախորդ խաղը եւ սխալները հիմնականում պաշտպանության գծում էին:
Չնայած այս խաղում մասնագետների մեծ մասը հավատում է փարիզյան թիմի հաղթանակին, իմ կարծիքով հաջորդ փուլ կանցնի «Սիթին»: Հնարավոր հաշիվը` 2:1
Վերա Մարտիրոսյան