Ստամբուլի ծանր հանցագործությունների 14-րդ դատարանում ապրիլի 19-ին տեղի է ունեցել Հրանտ Դինքի սպանության գործով դատավարությունը, որտեղ մեղադրյալի աթոռին են նստած եղել նախկին ու ներկա բարձրաստիճան զինվորականներ, ոստիկաններ ու պաշտոնյաներ։
Թուրքական Evrensel-ի փոխանցմամբ՝ դատական նիստի սկզբնական հատվածում մեղադրյալները դատավորին ինքնաբացարկ են հայտնել՝ պնդելով, թե դատական գործը քաղաքական շարժառիթներով է։
Դատարանում մեղադրյալներից ոստիկանության աշխատակից Մուհիթին Զենիթը պնդել է, որ սպանության կազմակերպման մասին տեղեկությունները հայտնել է համապատասխան մարմիններին, սակայն որեւէ քայլ չի ձեռնարկվել։ «Պետությունը զուրկ է բարոյականությունից։ Պետությունը աչք փակեց Դինքի սպանության վրա։ Իմ խիղճը հանգիստ է, քանի որ ես ամեն ինչ արել եմ սպանությունը կանխելու համար»,-ասել է Մուհիթին Զենիթը։
Դատական նիստի վերջում որոշում է կայացվել ստորագրությամբ ազատ արձակել Մուհիթին Զենիթին եւ եւս մեկ այլ ոստիկան Օզքան Մումջուին։
Հաջորդ դատական նիստը նշանակվել է մայիսի 24-ին։
Նշենք, որ Հրանտ Դինքի սպանության մեջ պետական պաշտոնյաների մեղսակցության գործով հետաքննության շրջանակներում դատախազությունը 34 ներկա ու նախկին պաշտոնյաների դեմ մեղադրանքներ է ներկայացրել։