Գերմանական ավտոմոբիլային Volkswagen կոնցեռնը համաձայնել է փոխհատուցում վճարել ԱՄՆ-ից մեքենաների այն սեփականատերերին, որոնք «դիզելային սկանդալի» մաս են կազմել, գրում է Gazeta-ն` վկայակոչելով Die Welt-ին:
Հաղորդվում է, որ այն մեքենաների սեփականատերերը, որոնք զինված են եղել ծրագրային սխալ ապահովմամբ, 5 հազարական դոլար կստանան: Այդ գումարից բացի, Volkswagen-ը պարտավոր կլինի վճարել փոխադրամիջոցների վերանորոգման համար:
Տվյալ որոշումը մեկը կլինի ավտոարտադրողի եւ ամերիկյան իշխանությունների միջեւ համաձայնագրի կետերից, գրում է թերթը:
Ավելի վաղ հաղորդվել էր, որ «դիզելգեյթից» հետո Volkswagen-ի վնասը գրեթե 4 մլրդ դոլար է կազմել:
Volkswagen-ի շուրջ «դիզելային սկանդալը» բորբոքվել էր 2015-ի սեպտեմբերին: ԱՄՆ-ի շրջակա միջավայրի պահպանության գործակալությունը ընկերությանը մեղադրել էր նրա համար, որ դիզելային շարժիչներով մեքենաներում տեղադրված ծրագրային ապահովումը թույլ էր տալիս թեստավորման ընթացքում թաքցնել արտաժայթքման մեջ թունավոր նյութերի առկայության իրական տվյալները: Սովորական շահագործման դեպքում ազոտի օքսիդի արտանետման ծավալը կարող է 40 անգամ գերազանցել բնապահպանական նորմերը:
