Ապրիլի 18-ից 21-ն ընկած ժամանակահատվածում ՀՀ պաշտպանության նախարարության եւ ՆԱՏՕ-ի միջեւ ամենամյա Անհատական գործընկերության համագործակցության ծրագրի շրջանակներում Երեւանում էր գտնվում Հյուսիսատլանտյան դաշինքի Բրունսումի համատեղ ուժերի հրամանատարության շարժական ուսումնական խումբը:
Հայաստանի ՊՆ-ից NEWS.am-ին հայտնում են, որ այցի նպատակը Վազգեն Սարգսյանի անվան ռազմական ինստիտուտի հրամանատարաշտաբային դասընթացի ունկնդիրների համար օպերատիվ պլանավորման գործընթացի վերաբերյալ դասընթացի անցկացումն էր:
Միջոցառման ընթացքում ՀՀ զինված ուժերի օպերատիվ-մարտավարական օղակի ապագա հրամանատարներին եւ շտաբային սպաներին ներկայացվեցին դասախոսություններ օպերատիվ միջավայրի համակողմանի վերլուծության եւ նախապատրաստման, իրավիճակի գնահատման, մարտական առաջադրանքի պարզաբանման, գործողության մտահղացման մշակման եւ օպերացիաների ուրվագծման եւ պլանավորման գործընթացների այլ փուլերի վերաբերյալ: Դասընթացի ավարտին ունկնդիրներին շնորհվեցին հավաստագրեր:
Հայաստանի Հանրապետության զինված ուժերի օպերատիվ պլանավորման գործընթացը հանդիսանում է ռազմական եւ մարտական գործողությունների վարման ձեւերի ու եղանակների ավելի լայն հասկացության բաղադրիչներից մեկը, որը «Խելամիտ պաշտպանության» համակարգի ձեւավորման շրջանակներում ենթարկվում է վերափոխման՝ այդ թվում նաեւ միջազգային խորհրդատվության ներգրավմամբ: