Հայաստանի ոստիկանությունը տեղեկություններ ունի, որ հանրությանը հայտնի եւ անհայտ որոշ անձինք պատրաստվում են հատկապես այս օրերին դիմել սադրանքների, անկարգություններ հրահրել, խախտել հասարակական կարգը մայրաքաղաքի որոշ հատվածներում: Այդ մասին NEWS.am-ի հետ զրույցում նշել է ոստիկանության հասարակայնության հետ կապերի վարչության պետ Աշոտ Ահարոնյանը։
Երկու օր առաջ ոստիկանության պաշտոնական կայքում հայտարարություն զետեղվեց, որով կոչ էր արվում ձեռնպահ մնալ ապրիլի 24-ի շրջանում հավաքներ կազմակերպելուց: Մեկ օր անց հայտարարությունը թարմացվեց, այսօր տարածվում է սոցցանցերում:
Ըստ Ահարոնյանի, իրենց տեղեկությունների համաձայն, հակաօրինական գործողություններն իրականացվելու են որպես քաղաքացիների իրավունքների իրացում եւ արտահայտություն: «Ոստիկանության համար հստակ են թե՛ քաղաքացիների՝ օրենքով նախատեսված իրավունքները, թե՛ իր լիազորություններն ու պարտականությունները: Ոստիկանությունը համարժեք հակազդելու է ցանկացած օրինազանցության եւ օրենքով սահմանված իր լիազորությունների շրջանակներում միջոցներ է ձեռնարկելու ցանկացած օրինազանցի նկատմամբ: Հասարակական կարգի լիարժեք պահպանումը հասարակության պահանջն է եւ ոստիկանության պարտականությունը, որն իրականացվում է ողջ ծավալով»,- նշել է նա եւ հավելել. «Համոզված եմ, որ հանրությունը ճիշտ կգնահատի Ցեղասպանության զոհերի հիշատակին նվիրված միջոցառումների ընթացքում հասարակական անվտանգության ապահովմանն ուղղված միջոցառումները, իսկ սադրանքների հակվածներին կրկին կոչ ենք անում ձեռնպահ մնալ անխոհեմ քայլերից եւ ինչ-ինչ հարցերի լուծման շահադիտությամբ չխախտել մեր ժողովրդի միասնությունն ու չվտանգել հասարակական անվտանգությունը»:
Ահարոնյանը նաեւ կոչ է անում լրագրողներին՝ նման իրավիճակներում հստակ պահպանել լրագրողի աշխատանքի կանոնները, չխոչընդոտել ոստիկանության աշխատանքը: «Ոստիկանի պարտականությունը հասարակական կարգը պահպանելն է, ձեր պարտականությունը՝ դրա լուսաբանումը: Ցավոք, մեր բազմաթիվ կոչերից հետո էլ ոչ բոլոր լրագրողներն են առաջնորդվում այս պարզ ճշմարտությամբ: Վստահ ենք, որ ոստիկանության կոչը արձագանք կգտնի մեր հանրության կողմից»,- նշել է նա: