Թուրք ազգայնականները Լոս Անջելեսի հայկական թաղամասում Հայոց ցեղասպանությունը հերքող կայքեր քարոզող պաստառներ են փակցրել: Այս մասին հաղորդում է Ամերիկայի հայկական խորհուրդը:
Խորհրդի ակտիվիստներից մեկը փորձել է պաստառները պոկել կոնգրեսական Ադամ Շիֆի (Ցեղասպանության ճանաչումը քարոզող գործիչներից - խմբ.) գրասենյակի հարեւանությամբ գտնվող շենքի պատից: Այդ ժամանակ նրան երեք տղամարդ են մոտեցել՝ հայտարարելով, որ աշխատում են Հայաստանի կառավարությունում եւ առաջադրանք ունեն՝ ճանաչողական պաստառների միջոցով երկու ժողովուրդների հաշտեցման գաղափարը տարածել: Բայց նրանք չեն կարողացել պատասխանել հայերի կամ նույնիսկ Հայաստանի կառավարության մասին տարրական հարցերի: Նրանք նաեւ հրաժարվել են իրենց նախաձեռնության մասին տվյալներ ներկայացնել:
Օրենսդիր ժողովների ներկայացուցիչները խստորեն դատապարտել են Ցեղասպանությունը հերքողների արարքը:
«Վիրավորական է ժխտողական քարոզչություն տեսնել այն փողոցներում, որտեղ այս օրերին տասնյակ հազարավոր մարդիկ քայլերթ են անցկացնելու Հայոց ցեղասպանության զոհերի հիշատակին: Քանի դեռ մենք ձայն ենք բարձրացնում հանուն ճշմարտության, Թուրքիայի եւ նրա դաշնակիցների ժխտողական արշավը չի հասնի նպատակին»,- հայտարարել է Ադամ Շիֆը:
«Ճիշտ չէ այդպիսի աբսուրդ պաստառներ հրապարակելը: Հայոց ցեղասպանության փաստերը խեղաթյուրող մարդիկ տեղ չունեն իմ շրջանում եւ Քալիֆորնիայում»,- հայտարարել է Քալիֆորնիայի վեհաժողովի անդամ Մայք Գատտոն:
Ավելի վաղ Հայոց ցեղասպանությունը հերքող Fact Check Armenia նախաձեռնությունը վճարել էր Բոստոնում, Նյու Յորքում եւ Սան Ֆրանցիսկոյում արտաքին գովազդային վահանակներում պաստառների տեղադրման համար: