Մեծ Բրիտանիան կարող է զորքեր ուղարկել Լիբիա՝ «Իսլամական պետություն» խմբավորման ահաբեկիչների դեմ պայքարի համար: Այս մասին The Telegraph-ին տված հարցազրույցում նշել է երկրի արտաքին գործերի նախարար Ֆիլիպ Համոնդը:
«Անիմաստ է ինչ-որ բան բացառել, որովհետեւ երբեք չգիտես՝ ինչպես կզարգանան իրադարձությունները: Բայց եթե երբեւէ կանգնի Բրիտանիայի ռազմական մասնակցության հարցը ցանկացած ձեւով՝ ցամաքում, ջրում, թե օդում, այդ հարցը կքննարկվի Համայնքների պալատում»,-ասել է Բրիտանիայի ԱԳ նախարարը:
Համոնդը այդ մտադրությունը բացատրել է նրանով, որ ապագայում ԻՊ-ը կարող է Լիբիան վերածել պլացդարմի՝ Եվրոպայի վրա կամ ծովում նավերի վրա ահաբեկչական հարձակումների համար, հաղորդում է Slon-ը:
Նշենք, որ 2014 թվականից Լիբիայում շարունակվում է ներքին հակամարտությունը միջազգային ճանաչում ունեցող Ներկայացուցիչների պալատի եւ համաիսլամական Համընդհանուր ազգային կոնգրեսի կողմնակիցների միջեւ, որը հանգեցրել է երկրի փաստացի պառակտման երկու մասի: Լիբիայում որոշ շրջաններ վերահսկում է «Իսլամական պետությունը»:
