Տեղեկատվական տեխնոլոգիաների ոլորտի հետ միշտ համագործակցել ենք եւ եթե լուրջ առաջարկներ են լինում, մենք իրականացնում ենք: Այս մասին այսօր՝ ապրիլի 24-ին, լրագրողների հետ զրույցում ասաց ՀՀ պաշտպանության նախարար Սեյրան Օհանյանը՝ անդրադառնալով ոլորտի մասնագետների պնդումներին, թե նախարարությունն իրենց հետ համագործակցությունը բավարար մակարդակի վրա չէ:
«ՏՏ ոլորտի հետ մենք միշտ համագործակցել ենք, եւ շատ առաջադեմ առաջարկներ օգտագործել ենք: Սկսած 1994թ.-ից՝ ռազմական արդյունաբերությունը Հայաստանում շարունակական զարգացման միտում ունի: Կուզեինք՝ տեմպերն ավելի արագ լինեին, սակայն այն իրականացվում է մեր հնարավորության շրջանակում: Եթե լուրջ առաջարկներ լինում են, մենք իրականացնում ենք, սակայն պետք է նաեւ հաշտվենք այն իրականության հետ, որ շատ մարդիկ ծրագրերի շրջանակում իրենց շահույթն են ունենում»,- ասաց Սեյրան Օհանյանը:
Պաշտպանության նախարարի խոսքով՝ երբեք չի եղել, որ այս կամ այն կազմակերպությունն ինքնուրույն տարբեր մշակումներ իրականացնի եւ արդեն պատրաստի արտադրանքը ներկայացնի եւ իրենք մերժեն:
«Եթե համապատասխանում է մեր տեխնիկական միջոցներին եւ այսօրվա պահանջներին, մենք ընդունում ենք»,- ասաց Սեյրան Օհանյանը:
Ավելի վաղ Ինֆորմացիոն տեխնոլոգիաների միության գործադիր տնօրեն Կարեն Վարդանյանը NEWS.am-ի թղթակցի հետ զրույցում ասել էր, որ Հայաստանում բանակի տեխնոլոգիական ոլորտը զարգացնելու պոտենցիալ կա, սակայն Պաշտպանության նախարարությունը դա անելու ցանկություն կարծես թե չունի:
«Հայ մասնագետները աշխատում են համաշխարհային լիդերների համար: Նրանց արտադրողականությունը, գիտելիքը ամենաբարձր մակարդակի վրա է, ՊՆ-ն կարող է հայ մասնագետների գիտելիքներն օգտագործել, բայց կարծես թե չի ուզում: Նայեք ցանկացած այլ երկրի բանակի, ինչ տեխնիկա ունեն, մենք էլ կարող էինք ունենալ»,- նշել էր ԻՏՁՄ գործադիր տնօրենը:
