Ապրիլի 24-ի կապակցությամբ Թուրքիայի նախագահ Էրդողանի ուղերձը ժխտողականության հերթական անհաջող դրսեւորումն է, Օսմանյան կայսրության իշխանությունների հայերի դեմ իրականացված ցեղասպանության պատասխանատվությունը հայերի վրա դնելու ակնհայտ փորձ։ Այս մասին հայտարարել է ԱԳ փոխնախարար Շավարշ Քոչարյանը:
«Թուրքիան շարունակում է ջանքեր գործադրել հավասար հարթության վրա դնելու պատերազմական զոհերին եւ նրանց, ովքեր զոհ դարձան պետական մակարդակով ծրագրված եւ իրականացված ցեղասպանության:
Թուրքիայի ժխտողական կեցվածքը ավելի է մեծացնում հայ եւ թուրք ժողովուրդների միջեւ առկա անջրպետը, որը վերացնելու լավագույն ճանապարհը պատմությանն առերեսումն է ու ապաշխարհանքը»,-ընդգծել է նա:
Նշենք, որ Թուրքիայի նախագահ Ռեջեփ Թայիփ Էրդողանը ապրիլի 24-ի կապակցությամբ կրկին ցավակցական ուղերձ է հղել Պոլսի Հայոց պատրիարքարանին, որտեղ մասնավորապես նշել է. «Երբեք չենք դադարի գործել հանուն խաղաղության ու բարեկամության՝ ընդդեմ բոլոր նրանց, որոնք փորձում են թշնամական հռետորաբանությամբ պատմությունը քաղաքականացնել եւ ջանում են օտարելընդհանուր պատմությամբ ու ավադույթներով փոխկապակցված 2 հարեւան ժողովուրդներին:
Մեկ անգամ եւս հիշատակում եմ այն օսմանցի հայերին, ովքեր կյանքից հեռացել են, եւ հղում եմ իմ ցավակցությունս նրանց թոռներին ու ծոռներին:
Անկախ նրանց էթնիկ եւ կրոնական ծագումից՝ ես նաեւ հարգում եմ բոլոր այն օսմանյան քաղաքացիների հիշատակը, որոնքկյանքից հեռացել են նույն այդ ժամանակաշրջանում: Կցանկանայի կրկնել, որ մենք կիսում ենք այդ ընդհանուր ցավը»:
